«Ազատություն» ռ/կ հայկական ծառայություն
Եվրամիությունը պատրաստ է աջակցել Հայաստանին՝ ԵՄ-ին մերձենալու ճանապարհին, հայտարարել է ԵՄ ընդլայնման հարցերով հանձնակատար Մարթա Կոսը։
«Սա մեծ ճանապարհային քարտեզ է նաև մեզ համար՝ Եվրամիության ներսում պատրաստվելու և թեկնածու երկրներին ազդանշան տալու, որ մենք պատրաստ ենք։ Եթե նրանք կատարում են իրենց պարտավորությունները, մենք էլ ենք կատարում մերը», – ասել է Կոսը՝ հավելելով․ «Մենք մեր պարտավորությունները կատարում ենք նաև Հայաստանի նկատմամբ»։
Եվրահանձնակատարի խոսքով՝ Հայաստանը «իսկապես շարժվում է Եվրամիության ուղղությամբ»։ Որպես օրինակ նա նշել է վիզաների ազատականացման գործընթացը։
Կարդացեք նաև
«Այս պահին Հայաստանը միակ երկիրն է, որի հետ մենք բանակցում ենք վիզաների ազատականացման շուրջ», – ասել է Կոսը։
Նա անդրադարձել է նաև Հայաստանի տնտեսությանը ԵՄ-ի աջակցությանը՝ նշելով, որ այն հատկապես կարևոր է Ռուսաստանի կողմից հայկական ապրանքների ներմուծման սահմանափակումների ֆոնին։
«Մենք մեծապես օգնում ենք, քանի որ Ռուսաստանն արգելել է ձեր երկրից ներմուծումները», – հայտարարել է Կոսը։
Կոսն անդրադարձել է նաև ռուսական սահմանափակումների ֆոնին Հայաստանին տրամադրվող տնտեսական աջակցությանը։ «Մենք մեծապես օգնում ենք, քանի որ Ռուսաստանն արգելել է ձեր երկրից ներմուծումները», – հայտարարել է նա։
Խոսքը ԵՄ-ի առաջարկած նոր առևտրային արտոնությունների մասին է, որոնցով հայկական մի քանի հարյուր տեսակի ապրանքներ հնարավորություն կստանան եվրոպական շուկա արտահանվել առանց մաքսատուրքի։ Բրյուսելն այդ արտոնություններն առաջարկել է ռուսական սահմանափակումների ֆոնին՝ հայկական արտահանողների համար նոր շուկաներ բացելու նպատակով։ Նախատեսվում է, որ արտոնյալ ռեժիմը կգործի սահմանափակ ժամկետով։
«Անդամ պետությունների և Եվրոպական խորհրդարանի աջակցությամբ մենք ընդունել ենք ինքնավար առևտրային միջոցներ, որպեսզի Հայաստանը կարողանա իր արտադրանքի 80 տոկոսն առանց մաքսատուրքերի արտահանել Եվրամիություն», – ասել է Կոսը՝ հիշեցնելով նաև Հայաստանի տնտեսական զարգացման համար նախատեսված առանձին աջակցության փաթեթի մասին։
