«Փաստինֆո». «Հալյուցինագեն սնկերի» շուրջ կրքերը չեն հանդարտվում։ «Փաստինֆո»-ի հաղորդմամբ՝ գործարար, բարերար, «Ուժեղ Հայաստան» կուսակցության առաջնորդ Սամվել Կարապետյանը հայց է ներկայացրել Նիկոլ Փաշինյանի դեմ։ Կարապետյանը պահանջում է դատական կարգով պարտավորեցնել Նիկոլ Փաշինյանին՝ հրապարակայնորեն ներողություն խնդրել 2026թ․ մայիսի 29-ին հնչեցված վիրավորանքի համար։ Կարապետյանը պահանջում է որպես ներողության տեքստ հրապարակել հետևյալը՝ «Ես՝ Նիկոլ Վովայի Փաշինյանս, ներողություն եմ խնդրում Սամվել Սարգսի Կարապետյանից այն բանի համար, որ 29/05/2026 թվականին հրապարակային ելույթիս ընթացքում Սամվել Կարապետյանի հասցեին հնչեցրել եմ վիրավորական արտահայտություններ»: Ներողության վերաբերյալ տեսանյութը և խորագիրը չպետք է պարունակի պատասխանողի կամ որիցե երրորդ անձի կողմից որևիցե հավելում կամ մեկնաբանություն, այլ պետք է բացառապես պարունակի ներողության տեքստը: Միևնույն ժամանակ Կարապետյանը պահանջում է Նիկոլ Վովայի Փաշինյանից բռնագանձել 3.000.000 ՀՀ դրամ՝ որպես վիրավորանքի համար փոխհատուցում։ Հայցը մակագրվել է Երևանի քաղաքացիական դատարանի դատավոր Տիգրան Սիմոնյանին։
Նշենք, որ հայցի առիթը Փաշինյանի՝ 2026թ․ մայիսի 29-ին հնչեցրած հայտարարությունն է, որով նա սպառնացել էր, որ դատարանում դեյուրե «սունկ է կերցնելու» Սամվել Կարապետյանին։ Փաշինյանն ասել է, թե մինչ այժմ Չինաստանը իր համար ասոցացվել է Մեծ Չինական պատի, Կոնֆուցիոսի, ինչպես նաև թղթի, վառոդի և մետաքսի ստեղծման հետ, հալուցինացիա առաջացնող սնկերի մասին առաջին անգամ լսել է «Կալուգացի Սամոյից» և նրա շրջապատից, քանի որ, ըստ Փաշինյանի, նրանք տարբեր երկրներ այցելելիս առաջին հետաքրքրության օբյեկտը հալուցիանացիա առաջացնող սունկն է։ Այժմ Կարապետյանը պահանջում է ներողություն խնդրել իրենից՝ այս խոսքերի համար։
Իզաբել Սահակյան
