Արմավիրի մարզի Մրգաշատ բնակավայրի թիվ 2 միջնակարգ դպրոցում օրերս անցկացվեց «Ձեր սխրանքն անմահ է, ձեր անունը՝ մեր սրտերում» խորագիրը կրող ռազմահայրենասիրական միջոցառումը, որը նվիրված էր Արցախյան հերոսամարտի մասնակից, մրգաշատցի ազատամարտիկ Գնել Մաղաքյանի մահվան 30-րդ տարելիցին:
Հերոսի անունը կրող դպրոցի բարձր դասարանի աշակերտները հանդես եկան բանաստեղծություններով, ինչպես նաև երաժշտական և պարային համարներով՝ այդպես ոգեկոչելով Գնել Մաղաքյանի և Հայաստանի ու Արցախի համար իրենց կյանքը տված բոլոր նահատակների հիշատակը:
«Խոնարհվեցինք բոլոր զոհերի առջև, հարգանքի տուրք մատուցեցինք մրգաշատցի նվիրյալների հիշատակին»,– նշում է միջոցառման գլխավոր կազմակերպիչը, ավելացնում՝ միջոցառման նպատակը աշակերտներին հայրենասիրական ոգով դաստիարակելն էր: «Նպատակ ունեինք նաև սովորեցնել երեխաներին, որ պետք է միշտ հիշել հերոսներին, փառաբանել նրանց անունը, խոնարհվել նրանց առջև, որովհետև մենք այսօր կանք և ապրում ենք նրանց շնորհիվ», – շեշտում է նա:
Կարդացեք նաև
Կազմակերպող ուսուցիչը Aravot.am-ի հետ կարճատև զրույցում ընդգծեց միջոցառման վերջին համարի կարևորությունը, որի խորհուրդն էր խաղաղ մանկությունը: Նա պատմում է․ «Մենք ուզում ենք, որ մեր մանուկները մեծանան միմիայն խաղաղ երկնքի տակ, որպեսզի ունենան խաղաղ մանկություն: Մանկության և խաղաղության կերպարն ամփոփված էր փոքրիկ երեխայի միջոցով»:
Հայաստանի բարօրությունը մշտապես եղել է Գնել Մաղաքյանի մտքում: 1988 թվականի աղետաբեր երկրաշարժի հենց հաջորդ օրը Մաղաքյանը ընկերների հետ հիմնել է «Մրգաշատ» փրկարարական ջոկատը, որը մեկնեց աղետի գոտի՝ փրկարարական գործողություններ իրականացնելու:
Արցախյան ազատամարտին Մաղաքյանը մասնակցել է որպես սակրավոր: Սակրավորական գիտելիքները նա ձեռք է բերել ինքնուս կերպով: Ռազմական գործողություններին միացել է 1989-ին, իսկ 1993-ին մեկնել է Շահումյանի շրջանի հայկական կազմավորումներին: Շահումյանի Թալին գյուղում հունիսի 7-ին վիրավորվել է ականի պայթյունից, բայց որոշել է չլքել մարտական դիրքն ու ընկերներին: Մաղաքյանը զոհվել է նույն օրը՝ երկրորդ ականի պայթյունից:
Նրա աճյունն ամփոփված է Մրգաշատի հերոսների պանթեոնում: ՀՀ նախագահի հրամանագրով Գնել Մաղաքյանը հետմահու պարգևատրվել է Արիության մեդալով:
«Երբ ինքը գնում էր, ես չէի ընդդիմանում, բայց վերջին անգամ երբ գնաց ու էլ չվերադարձավ, գնալուց առաջ երեխաները փաթաթվել էին ոտքերին, խնդրում էին, որ չգնա, բայց անգամ երեխաները հետ չկարողացան պահել: Ես էլ երեխաներիս ասում էի, որ երեխեք ջան, մի ընդդիմացեք: Ինքը գնում է պաշտպանելու իր ընտանիքը, ձեզ»,- «Հայկական ժամանակին» տված հարցազրույցում 2021-ին պատմել է Գնել Մաղաքյանի այրին՝ Անահիտ Հարությունյանը:
Արսեն ԱՅՎԱԶՅԱՆ
