Այսուհետ Գորիսից Ակներ բնակիչները կարող են երթեւեկել նորոգված, ասֆալտապատ ճանապարհով։ Անցած տարի նորոգվել էր ճանապարհի մի մասը, իսկ այս տարի այն հասցվեց իր վերջնագծին։ Նորոգումը արժեցել է 450 մլն դրամ։ Այն իրականացվել է սուբվենցիոն ծրագրի արդյունքում․ պետության համաներդրումն այստեղ 45 տոկոս է։ Դեկտեմբերի 25-ին տեղի ունեցավ ճանապարհի հանդիսավոր բացումը։ Ակներ բնակավայրում Գորիսի համայնքապետարանի եւ ՄԱԶԾ «Կայուն համայնքներ» ծրագրի համատեղ ուժերով խաղահրապարակ բացվեց։ Ի դեպ, սա համատեղ ծրագրի շրջանակում՝ թվով 9-րդ խաղահրապարակն է տեղադրվում Գորիս համայնքում:
Օրը տոնական էր նաեւ Վերիշեն բնակավայրում․ այստեղ էլ հիմնանորոգվել էր մանկապարտեզը։ Նախակրթարանի հիմնանորոգման աշխատանքները սկսվել էին ամիսներ առաջ եւ «Փարոս» հիմնադրամի աջակցությամբ ընթացել մի քանի փուլով։ «Ֆոքըս օն չիլդրեն նաու» բարեգործական կազմակերպության միջոցներով նոր գույք է ձեռք բերվել։ Հիմնանորոգումից հետո նոր խմբեր կբացվեն մանկապարտեզում ու Ակներ, Վերիշեն բնակավայրերի մոտ 50 երեխա կհաճախեն այստեղ։
Կարդացեք նաև
200 մլն դրամ բյուջեով նորոգվել է նաեւ Գորիսի Մխիթար Սպարապետ փողոցը․ այստեղ ֆինանսավորումը կատարվեց պետություն-համայնք համաչափությամբ։
Գորիսի համայնքի ղեկավար Առուշ Առուշանյանի խոսքով՝ այս տարի լրանում է Դավիթ Բեկի գլխավորությամբ Սյունիքի ազգային-ազատագրական պայքարի 300-ամյակը, ուստի երկու փողոց անվանափոխվեց։ «Շատ կարեւոր էր , որ համայնքում ունենանք Դավիթ Բեկի ու Մխիթար Սպարապետի անուններով փողոցներ, Աստծո կամոք հասցրեցինք, ու սա ուժի սիմվոլ է Կարծում եմ, 300 տարի հետո նույն հաղթանակները կկրկնենք»,- լրագրողների հետ զրույցում ասաց Առուշ Առուշանյանը։
Գորիսի համայնքապետը համոզված է՝ «թշնամու մի փամփուշտին պիտի 100 փամփուշտով պատասխանենք»։ «Բնության օրենք է՝ ուժեղները պիտի ապրեն, թույլերը վերանան։ Մենք պետք է զենք վերցնենք ու կռվենք։ Պետք է պայքարենք մեր հայրենիքի համար, մենք բարոյական իրավունք չունենք ապրելու, եթե չպայքարենք մեր իրավունքների համար»,-մասնավորապես նշեց Առուշ Առուշանյանը։
Ի դեպ, այսօր՝ դեկտեմբերի 25-ին վառվեցին Գորիսի գլխավոր եղեւնու լույսերը։
Գորիսյան միջոցառումներին մասնակցեց նաեւ Սյունիքի մարզպետ Ռոբերտ Ղուկասյանը։
Արմեն ԴԱՎԹՅԱՆ
