Aravot.am-ի տեղեկություններով, այս տարվա սեպտեմբերի 25-ին Արագածոտնի մարզի Ծաղկահովիտ խոշորացված համայնքում ՏԻՄ ընտրությանն առաջադրված ավագանու թեկնածու Հ․Ս․-ն, որը գլխավորել է «Հանրապետություն» կուսակցության ընտրական ցուցակը, հայտնվել է իրավապահների ուշադրության կենտրոնում։
Իրավապահ մարմիններից մեր աղբյուրի փոխանցմամբ, ավագանու թեկնածու Հ․Ս․-ն սեպտեմբերի 3-ին նույն համայնքի բնակիչներին (ընտանիքի անդամներին) իր օգտին քվեարկելու դիմաց խոստացել է Ա․Ս․-ի խնամակալության տակ գտնվող երեխայի որդեգրման հարցը լուծել։ Ավելի կոնկրետ, ավագանու թեկնածուն խոստացել է որդեգրման գործընթացը կազմակերպել իր ծանոթ փաստաբանների միջոցով, նաեւ խոստանալով վճարել փաստաբանական ծառայությունների համար։ Ընտանիքի անդամներն, ըստ մեր աղբյուրի, ընդունել են խոստումը։ Այս գործի առնչությամբ ԱԱԾ քննչական դեպարտամենտում կատարվում է նախաքննություն:
Հիշեցնենք, որ նոր Քրեական օրենսգրքով ընտրակաշառք տալը պատժվում է ազատազրկմամբ։ Մասնավորապես՝ Քրեական օրենսգրքի 219-րդ հոդվածով՝ Ընտրակաշառք տալը, սահմանվում է՝
1. Հանրաքվեին կամ ընտրությանը մասնակցելու, հանրաքվեին կամ ընտրությանը որեւէ ձեւով քվեարկելու, քվեաթերթիկն անվավեր դարձնելու կամ հանրաքվեին կամ ընտրությանը մասնակցելուց հրաժարվելու պայմանով ընտրողին անձամբ կամ միջնորդի միջոցով ընտրակաշառք՝ գույք, ներառյալ դրամական միջոց, արժեթուղթ, վճարային այլ գործիք, գույքի նկատմամբ իրավունք, ծառայություն կամ որեւէ այլ առավելություն առաջարկելը, խոստանալը կամ տալը՝
Կարդացեք նաև
պատժվում է ազատազրկմամբ` երեքից վեց տարի ժամկետով:
2. Սույն հոդվածի 1-ին մասով նախատեսված արարքը, որը կատարվել է մի խումբ անձանց կողմից նախնական համաձայնությամբ՝
պատժվում է ազատազրկմամբ՝ չորսից ութ տարի ժամկետով:
Նելլի ԲԱԲԱՅԱՆ
Ծաղկահովիտ համայնքի լուսանկարը՝ https://hy.wikipedia.org/–ից
