Ադրբեջանի պետական տնտեսագիտական համալսարանում (UNEC) վերսկսվել Է «Հայոց լեզու» դասընթացը:
Ինչպես հաղորդում է APA-ն, դասընթացի ընթացքում հետազոտողները մշտապես կհետևեն հայկական լրատվամիջոցների հրապարակումներին, կպատրաստեն նմանատիպ նյութեր, հայերեն աղբյուրներից կստանան ավելի լիարժեք տեղեկատվություն Հայաստանի տնտեսական վիճակի և այլ հարցերի մասին, ինչպես նաև հանդես կգան գիտական հոդվածներով և կտեղեկացնեն միջազգային հանրությանը:
Հիշեցնենք, որ ավելի վաղ հայտնի էր դարձել հայկական դպրոցներում ադրբեջաներենի և թուրքերենի ուսուցում կազմակերպելու մասին։ ՀՀ կրթության, գիտության, մշակույթի և սպորտի նախարարությունը տեղեկացրել էր, որ հանրակրթական ուսումնական հաստատություններում տարածաշրջանային լեզուների ուսուցման իրականացման նպատակով պարսկերենի, վրացերենի, թուրքերենի և ադրբեջաներենի առարկայական ծրագրերի հեղինակները պարգևատրվել են ԿԳՄՍ նախարարության շնորհակալագրերով:
Ըստ Ժաննա Անդրեասյանի՝ նախարարությունը մայիսին հարցում է իրականացրել ՀՀ բոլոր դպրոցներում՝ որպես 3-րդ օտար լեզու և (կամ) խմբակ տարածաշրջանային որևէ լեզվի ուսուցում կազմակերպելու պատրաստակամության մասին՝ հաշվի առնելով հաստատության ինքնավարությունը: Հարցման արդյունքում ստացվել է շուրջ 400 դրական արձագանք, որի մեծ մասը եղել է ադրբեջաներենի և թուրքերենի ուսուցում կազմակերպելու ցանկության մասին:
Կարդացեք նաև
«Մասնագիտական քննարկումների արդյունքում որոշում է կայացվել ադրբեջաներենի և թուրքերենի ուսուցումը կազմակերպել բացառապես 10-12-րդ դասարանների սովորողների համար, սակայն սա նաև ցույց է տալիս դպրոցների և հանրության շրջանում այն գիտակցումը, որ լեզուների իմացությունը կարող է լինել կարևոր խնդիրներին առնչվելու ճանապարհներից մեկը»,- փաստել է Ժաննա Անդրեասյանը՝ հավելելով, որ նախարարությունը բազմաթիվ գրություններ և զանգեր է ստանում համապատասխան մասնագետներից, որոնք դասավանդման ցանկություն են հայտնում:
Ադրբեջաներենի առարկայական ծրագրի հեղինակ Լիլիթ Մովսիսյանը, շնորհակալություն հայտնելով խրախուսական պարգևի համար, բարձրաձայնել է մասնագետներին հետաքրքրող մի շարք հարցեր, որոնք, մասնավորապես, վերաբերել են համապատասխան դպրոցների և մասնագետների տվյալների բազա ստեղծելու հնարավորության, ուսումնական նյութերի և մանկավարժի որակավորում չունեցող մասնագետների ներգրավման խնդիրներին:
Ի պատասխան՝ Ժաննա Անդրեասյանը տեղեկացրել է, որ առաջիկա օրերին նախարարությունը կունենա ամփոփ տվյալներ՝ դպրոցների հստակ թվի և համապատասխան մասնագետների առումով: Նրա խոսքով՝ մանկավարժի որակավորում չունեցող բարձրագույն կրթություն ստացած մասնագետները, որոնք ձեռք են բերել 30 կրեդիտ, հնարավորություն կստանան դասավանդել դպրոցներում։ Փոխնախարարը հավաստիացրել է՝ քանի որ ծրագիրն այս տարի ներդրվում է փորձնական կարգով, հետևաբար կիրականացվի մոնիթորինգ՝ խնդիրների վերհանման և ծրագրերի լրամշակման համար, որի ընթացքում կշարունակվի համագործակցությունն առարկայական ծրագրերի հեղինակների հետ:
Պատրաստեց Վիկտորյա ԱՆԴՐԵԱՍՅԱՆԸ
