Այսօր Վանաձորի բժշկական կենտրոնից արդեն տուն տեղափոխվեց 44-օրյա պատերազմի հերոս Ռադիկ Հովակիմյանի կրտսեր եղբայրը՝ Ռադիկը: Փոքրիկը լույս աշխարհ է եկել օգոստոսի 19-ին: Մայրը՝ տիկին Հայարփին պատմում է, որ մինչ փոքրիկի մասին իմանալը, Ռադիկը երազ է եկել, մորը հորդորելով չնեղվել. «Բալիկիս մահանալուց հետո շատ վատ էի, 40 օր հետո ինքը երազ եկավ, որ մի նեղվի ես գալու եմ: Ու ես էլի էդ նույն ապրումներն ապրեցի: Բայց որ հետո լավ չէի զգում, եկա բժշկի մոտ, որ տեսնեմ ինչ խնդիր կա, բժիշկն ասեց Աստծո տված պարգեւն է»:
Կրտսեր Ռադիկն իր ծնունդով տան անդամների համար ապրելու նոր հույս ու շունչ է բերել. «22 տարի առաջվա նույն զգացողություններն ունեմ: Նորից մայրանալ: Այս պահին առողջական խնդիրներ չունեմ, լավ եմ զգում ինձ: Գոհ եմ նաեւ բժիշկների վերաբերմունքից»:
Կարդացեք նաև
Ռադիկին տուն տանելու էին եկել հայրը, ավագ քույրն ու եղբայրը, ընտանիքի մյուս անդամները: Վանաձորի բժշկական կենտրոնի բակում այսօր իրար էին խառնվել հուզմունքը, ցավն ու ուրախությունը, հերոս Ռադիկը վերածնվել է եղբոր միջոցով:
Ավագ Ռադիկը ծառայում էր Արցախում, մի քանի ամիս էր մնացել ծառայության ավարտին, երբ սկսվել էր 44-օրյա պատերազմը: Պատերազմի 2-րդ օրը՝ սեպտեմբերի 28-ին, ԱԹՍ-ի հարվածից ծանր վիրավորում էր ստացել, ապա տեղափոխվել հիվանդանոց, որտեղ էլ հոկտեմբերի 5-ին ստացած ծանր վնասվածքների հետեւանքով մահացել:
Տաթեւիկ ՂԱԶԱՐՅԱՆ
