«Իշխանափոխության համար անհրաժեշտ է հանրային աջակցություն․ հանրային աջակցության որեւէ նշույլ իշխանափոխության մակարդակի ես չեմ տեսնում։ Իշխանությունը ձեւավորվում է բացառապես ժողովրդի կամքով»,-խորհրդարանում լրագրողների հետ ճեպազրույցում այսօր, անդրադառնալով հարցադրմանն այն մասին, թե Նիկոլ Փաշինյանի հրաժարականի պահանջով դիմադրության շարժումից իշխանափոխության վտանգ տեսնո՞ւմ եք, հայտարարեց ՀՀ ՊԵԿ նախագահ Ռուստամ Բադասյանը։
«Հանրային պահանջ պետք է լինի, որ որեւէ գործընթացի համար լինի նախադրյալ»,-նշեց նա։ Նկատառմանն ի պատասխան, թե ըստ ընդդիմության՝ փողոցում հիսուն հազար մարդ կա, Բադասյանն ասաց, որ անձամբ թվերը չի հաշվում, բայց նման թիվ ունենալու դեպքում ակնհայտ կլիներ հավաքի ծավալը․ «Ես չեմ տեսել նման բան»։
Ինչ վերաբերում է ցուցարարների հանդեպ ոստիկանության գործողություններին, Բադասյանը կարծիք հայտնեց, որ դրանք համաչափության ստանդարտներին համապատասխան են․ «Առանձին դեպքերում, երբ համաչափ չեն, պատկան մարմիններն արձագանքում են»։
Լուիզա ՍՈՒՔԻԱՍՅԱՆ
