«Ամերիկայի ձայն». Ռուսաստանի գլխավորած ռազմական դաշինքը հունվարի 13-ին սկսեց իր զորքերը դուրս բերել Ղազախստանից: Այս մասին է հաղորդում «Ռոյթերս» լրատվական գործակալությունը: Հիշեցնենք, որ ՀԱՊԿ-ն այստեղ զորքեր էր ուղարկել այս երկրում հետխորհրդային պատմության ընթացքում ամենալայնածավալ անկարգությունների օրերին:
Ղազախստանի նախագահ Կասիմ-Ժոմարտ Տոկաևն անցյալ շաբաթ էր օգնություն խնդրել Հավաքական անվտանգության պայմանագրի կազմակերպությունից, երբ խաղաղ ցույցերը վերածվեցին զանգվածային անկարգությունների եւ գրանցվեցին մեծաթիվ բռնություններ:
Ըստ «Ռոյթերս»-ի, Ղազախստանի իշխանությունները չորեքշաբթի օրը հայտարարեցին երկրի մեծ մասում «հակաահաբեկչական գործողության» ավարտի մասին, չնայած այն հանգամանքին, որ երկրի խոշորագույն քաղաքը՝ Ալմաթիին դեռեւս չի համարվում լիովին անվտանգ:
Դեռեւս չի հայտարարվում այն մասին, թե այս երկրում տեղակայված ՀԱՊԿ-ի 2500 թվակազմով ուժերի որ մասն է անմիջապես հեռանում։ Դաշինքը հայտարարել է, որ խաղաղապահ զորախումբը լիովին դուրս բերելու համար կպահանջվի 10 օր:
Կարդացեք նաև
ՀԱՊԿ-ի զորքերը սկզբում տեղակայվեցին մայրաքաղաք Նուր-Սուլթանի կառավարական շենքերում՝ հեռու անկարգությունների կենտրոններից, իսկ ավելի ուշ հսկեցին Ալմաթիի որոշ հիմնական ենթակառուցվածքային օբյեկտներ, ինչպիսիք են խոշոր էլեկտրակայանները:
Անկարգությունների ընթացքում Ղազախստանի իշխանությունները 10,000 մարդու են ձերբակալել: Այդ օրերին այստեղ գրանցվել են անվտանգության ուժերի դեմ իրականացված հարձակումներ, գրավվել և հրկիզվել են կառավարական շենքեր, իրականացվել է խանութների թալան:
Բողոքի ցույցերը սկսվեցին վառելիքի գների բարձրացման պատճառով, որոնք շուտով վերածվեցին հասարակական շենքերի դեմ գրոհների` անկախացումից երեսուն տարի անց գրանցելով ամենալայնածավալ անկարգություններն այս երկրում:
