Կառավարությունը նախատեսում է մինչեւ 2026 թվականը նվազագույն աշխատավարձը հասցնել 85 հազար դրամի։ Այս մասին այսօր խորհրդարանում հանձնաժողովների համատեղ նիստում, 2022 թվականի պետական բյուջեի նախագծի քննարկման ժամանակ հայտարարեց աշխատանքի եւ սոցիալական հարցերի փոխնախարար Ռուբեն Սարգսյանը: Առաջին քայլերը կարվեն 2023 թվականին։
Հիշեցնենք, որ Հայաստանում նվազագույն ամսական աշխատավարձը 68 հազար դրամ է:
The joint sitting of the NA Standing Committees on Labor, Social and Financial-Budgetary Affairs took place at the RA National Assembly
Փոխնախարարը պատասխանում էր «Հայաստան» խմբակցության պատգամավոր Թադեւոս Ավետիսյանի հարցին՝ 2022-ի բյուջեում նվազագույն ամսական աշխատավարձի բարձրացում չի նախատեսվում, մինչդեռ դրա անհրաժեշտությունը կա: Ըստ պատգամավորի, հունիսի դրությամբ նվազագույն սպառողական զամբյուղը 70 հազար դրամ էր, այժմ, իր գնահատմամբ, 75 հազար դրամ, գնաճն էլ շարունակվում է եւ մինչեւ տարեվերջ՝ կառավարության գնաճի սահմանած ցուցանիշով, նվազագույն սպառողական զամբյուղը կմոտենա 80 հազար դրամին:
Այս պարագայում պատգամավորին անհասկանալի է, թե ինչո՞ւ 13, 5 միլիարդ դրամի չափով կրճատվել են ուղիղ սոցիալական հատկացումները: Օրինակ, պատվովճարների, անապահովության նպաստի, որի ամսեկան չափը 31 հազար դրամ է: 670 միլիոն դրամով էլ սոցիալական փաթեթի չափն է նվազել: 18-ից բարձր տարիքի համար տրամադրվող խնամքի ծառայությունները նույնպես կրճատվել են, աշխատավայրում դժբախտ դեպքերի համար փոխհատուցվող գումարներն են ցածր, դեռ 8 միլիոն դրամով էլ կրճատվել են: 534 միլիոն դրամով կրճատվում են նաեւ զբաղվածության աջակցության ծրագրերը, ինչը չի համապատասխանում կառավարության ծրագրի այն դրույթին, որ մարդուն նպաստից աշխատանք են տեղափոխելու: Նվազել է նաեւ կանանց ու ընտանիքներին տրամադրվող օգնությունների չափը, կենսաթոշակային ապահովության ծրագրերը՝ 4,4 միլիարդով են կրճատվել: 585 հազար կենսաթոշակառուներից եւ սոցիալական նպաստառուներից, բյուջեով նախատեսվող բարձրացումը, ըստ պատգամավորի, վերաբերվում է 17 տոկոսին, այն էլ՝ 3-4 հազար դրամով: Մինչդեռ, 28 տոկոսով ավելացել են կառավարման ապարատի ծախսերը եւ եթե սա ուղղվեր կենսաթոշակների բարձրացմանը, հնարավոր կլիներ 10 տոկոսով բարձրացնել բոլոր կենսաթոշակառուների կենսաթոշակը:
Կարդացեք նաև
Նարեկ Մկրտչյան
Նախարար Նարեկ Մկրտչյանը ընդհանրական պատասխաններ տվեց՝ նկատելով, որ երկիրը երկու ճգնաժամ է անցել՝ պատերազմ եւ կորոնավիրուս, ինչը եւ տնտեսական եւ սոցիալական բեռ է բերել: Միաժամանակ, ըստ նրա, նվազագույն կենսաթոշակի, սոցիալական ապահովության նպաստների բարձրացում նախատեսված է: 15.600 աշխատանքային թոշակառուների, նաեւ զինծառայողների կենսաթոշակների բարձրացում է նախատեսված: Անապահովության գնահատման համակարգում էլ հայեցակարգային փոփոխություններն են քննարկվում:
Ոլորտային այլ փոխնախարարներն էլ իրենց պարզաբանումներում նկատեցին, որ կառավարության հնգամյա ծրագրում են շատ միջոցառումներ նախատեսվում, բայցի այդ, կան ծրագրեր, որոնք իրականացվում են միջազգային կառույցների օժանդակությամբ, ուստի բյուջեի նախագծում ներառված չեն:
Նելլի ԳՐԻԳՈՐՅԱՆ
Լրացում. Ավելի ուշ, նախարարության գլխավոր քարտուղարը հստակեցրեց, որ ՀՀ աշխատանքի եւ սոցիալական ապահովության նախարարության ապարատի պահպանման ծախսերը չեն ավելացել: Նախագծում նշված թվի ավելացումը պայմանավորված է միասնական սոցիալական ծառայության կառույցի պահպանման ծախսերով: Կառույցը ստեղծվել է 2021-ին ապրիլի 1-ից, որին միացել են մարզպետարանների համապատասխան բաժինները:
