«Առավոտի» տեղեկություններով՝ սեպտեմբերի 15-ին ոստիկանությունը դատախազությունից ստացել է «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանի դիմումն, որ ՀՀ ԱԺ նիստերի դահլիճում գտնվող լրագրողների համար նախատեսված սենյակում ԱԺ անվտանգության աշխատակիցները խոչընդոտել են լրագրողներ՝ Լիլիթ Կասյանի, Սեդա Ղուկասյանի եւ Նարեկ Կիրակոսյանի օրինական մասնագիտական գործունեությունը: Նախապատրաստվում են նյութեր:
Դանիել Իոաննիսյան
Հիշեցնենք, որ օգոստոսի 25-ին Դանիել Իոաննիսյանն իր ֆեյսբուքյան էջում գրել էր. «Այցելեցի խորհրդարանում աշխատող և այսօրվա դեպքերից տուժած լրագրողներին: Ոմանց վրա ակնհայտ երևում էին կիրառված բռնության հետքերը:
ԱԺ տարածքում փորձեցինք գտնել լրագրողների դեմ բռնություն գործադրած անվտանգության աշխատակիցներին: Մի մասին գտանք, մի մասին դեռ ման կգանք (հեռու չեն փախնի):
Factor-ի, Civilnet-ի, Հ1-ի, Հ2-ի, 24news-ի, Para TV-ի, Հրապարակի ու Meganews-ի լրագրողներին (նույնիսկ առանց որևէ պահանջ ներկայացնելու) ուժի կիրառմամբ դուրս են հանել ԱԺ նիստերի դահլիճի օթյակից: Այդ լրագրողների օրինական մասնագիտական գործունեության խոչընդոտման և նրանց նկատմամբ բռնության կիրառման դեպքով հանցագործության մասին հաղորդում ենք ուղարկել գլխավոր դատախազին:
Կարդացեք նաև
Ազնվության համար պետք է ասեմ, որ որոշ պատգամավորներ և անվտանգության աշխատակիցներ ներողություն խնդրեցին լրագրողներից նրանց նկատմամբ կիրառված բռնության համար: Անվտանգության աշխատակիցներն իրենց գործողությունները պայմանավորում էին «վերևից եկած հրամանով»՝ առանց հստակեցնելու, թե որտեղից է այն արձակվել:
Հ.Գ. Խորհրդարանի ղեկավարության հետ հարցը չեմ քննարկել ու չեմ էլ ուզում քննարկել (թող այս ամենից առաջ խորհրդակցեին): Այս հարցը քննարկվելու է իրավապահ/դատական մարմիններում ու միջազգային կառույցների սահմաններում (ՀԿ-ների հայտարարությունը արդեն ուղարկվել է մի շարք կառույցների):
