Վարչապետ Նիկոլ Փաշինյանի հուլիսի 14-ի որոշմամբ Մեղրի համայնքի ղեկավարի պաշտոնակատար է նշանակվել Արարատ Թումանյանը։ Վերջինս 46 տարեկան է, ավարտել է «Հրաչյա Աճառյան» համալսարանը, մասնագիտությամբ իրավագետ է։ Ամուսնացած է, ունի երկու զավակ։ Ի դեպ, Թումանյանը «Քաղաքացիական պայմանագիր» կուսակցության Մեղրու տարածաշրջանի պատասխանատուն է։
«Չեմ կարող ասել, միակ արժանի թեկնածուն էի։ Մեր թիմում շատ կան մարդիկ, որոնք կարող էին աշխատել այս պաշտոնում»,–Aravot.am-ի հետ հեռախոսազրույցում ասաց Մեղրիի համայնքի ղեկավարի պաշտոնակատարը։
Այն դիտարկմանը, թե կառաջնորդվի Արարատ Թումանյանը պողպատե մանդատով՝ ասաց․ «Քանդելը հեշտ է, ծնված օրվանից այստեղ եմ ապրում։ Չար չեմ, բարիդրացիական հարաբերություններ կլինեն բոլորի հետ։ Պողպատե մանդատը միայն օրենքի սահմաններում կկիրառվի, այսինքն` միայն օրենքի գերակայությունը կլինի իմ աշխատանքային օրակարգում։ Մեղրիի տարածաշրջանում խնդիրները շատ են, կարծում եմ համատեղ աշխատանքով հնարավոր կլինի ելք գտնել»,–ասում է Թումանյանը։
Կարդացեք նաև
Այն հարցին, թե հավատո՞ւմ է իր քաղաքական ուժի կարգախոսին՝ պատասխանեց․ «Այո՛, հավատում եմ, ապագա կա, նույնիսկ ես իմ համար կարգախոս եմ ընտրել ՝ լավ ապագա կա»։
Հիշեցնենք, որ Մեղրիի համայնքի նախկին ղեկավար Մխիթար Զաքարյանը հրաժարական էր ներկայացրել հուլիսի 9-ին, որպեսզի վերցնի պատգամավորի մանդատը։ Սակայն նրան հուլիսի 12-ին երկու ամսով կալանավորեցին։
Արմեն ԴԱՎԹՅԱՆ
