Այսօր կառավարության առաջ անժամկետ հացադուլ սկսած Գեղամ Մանուկյանին, Սահմանադրական դատարանի նախկին անդամ Կիմ Բալայանին եւ այլոց տեսակցության եկած ԱԱԾ նախկին ղեկավար Արթուր Վանեցյանը պատասխանեց նաեւ քաղաքացիների հարցերին:
Նրանք նույնպես կառավարության առջեւ էին՝ պահանջելով լուծել անհայտ կորած եւ գերության մեջ հայտնված զինծառայողների հարցերը:
Տեսնելով պարոն Վանեցյանին, քաղաքացիները հետաքրքրվեցին՝ անհայտ կորած եւ գերության մեջ հայտնված զինծառայողների հարցով ի՞նչ քայլեր են ձեռնարկում: Ի պատասխան, Արթուր Վանեցյանն ասաց, որ դա այսօր ամենակարեւոր հարցն է, սակայն ընդդիմության հնարավորությունները սահմանափակ են. «Փորձում ենք բացատրել այս իշխանություններին, որ իշխանության համար պայքարելու փոխարեն, առաջնահերթ պետք է զբաղվել անհայտ կորած զինվորների ճակատագրով: Քաղաքականությունը, պաշտոնը, պահելը զրո է մեկ զինվորի համեմատությամբ»:
Կարդացեք նաև
Պարոն Վանեցյանի խոսքով, ինքը երկար տարիներ աշխատել է ԱԱԾ-ում, ունի անձնական մեծ կապեր, բայց ինքը պետություն չի, որ կարողանա ինչ-որ բան անել:
«Թող կանչի բոլոր կարող մարդկանց, դնենք մի կողմ քաղաքական պայքարը, ասենք՝ եկեք կպնենք իրար, գնանք ամեն մեկս մի տեղ եւ, եթե ամեն մեկս մի զինվոր էլ գտնի, ձեր աչքերում….»:
Քաղաքացին հարցրեց՝ առաջարկե՞լ եք իրեն: Արթուր Վանեցյանն ասաց՝ ինքը մեզ չի լսում, ասում է՝ դավաճան եք: Պարոն Վանեցյանի խոսքով, եթե հիմա իրեն անձամբ հանձնարարվի, որ գնա այդ հարցով զբաղվի, ոչ մի քաղաքական գործընթացի չի մասնակցի՝ մինչեւ այս ամեն հարցերը չլուծի:
Արթուր Վանեցյանը վստահեցրեց, որ պաշտոնի կռիվ չեն անում, պարզապես ուզում են «անկարող մարդկանց քշել, որպեսզի գան կարող մարդիկ, գործ անեն»:
Քաղաքացին, որի որդին նույնպես անհայտ կորածների ցուցակում էր, հակադարձեց. «Որ հրաժարական պահանջեցինք` ի՞նչ է փոխվելու, մեր երեխաներին մե՞զ են տալու»: Պարոն Վանեցյանն ասաց՝ շուտ պետք է անեիք, շուտ:
Լուսինե ԲՈՒԴԱՂՅԱՆ
