Վաղը ԱԺ-ն արտահերթ նիստ է անելու, օրակարգում են Սահմանադրական փոփոխություններից հետո այլ օրենքների հետ համապատասխանեցման նախագծեր:
Այսօր այդ առնչությամբ ԱԺ-ում լրագրողները «Իմ քայլի» պատգամավոր Տիգրան Ուլիխանյանին հարցրեցին՝ ձեզ հայտնի՞են ՍԴ դատավորների թեկնածուների անունները, օրինակ, Գագիկ Ջհանգիրյանի անունն է շրջանառվում՝ Ուլիխանյանը պատասխանեց, որ նման տեղեկություններ չունի. «Երբ անունը կգա ԱԺ նիստերի դահլիճ, ընտրություն կկատարենք: Մինչեւ ԱԺ գալը թե ինչ անուններ կշրջանառվեն, իմ հետաքրքրությանը չի վերաբերում»:
Հարցին՝ լուրեր են շրջանառվում, որ ձեզ պատրաստվում են նշանակել Պետական վերահսկողական ծառայության պետ, քանի որ դուք այնտեղ աշխատել եք, նման հարց վարչապետի հետ քննարկվե՞լ է ու եթե նման առաջարկ ստանաք՝ կընդունե՞ք՝ Ուլիխանյանը պատասխանեց. «Ենթադրում եմ՝ իմ անունը շրջանառվում է այն պատճառով, որ ես աշխատել եմ մինչեւ խորհրդարան գալը: Այլ մանրամասներ չեմ ուզում ասել, ես այս պահին ԱԺ պատգամավոր եմ: Ինչ էլ լինի իմ ապագան՝ ՀՀ-ին ծառայելու հետ կապված, լինելու է հրապարակային եւ եթե որեւէ որոշում կայացվի, ես դրա մասին անպայման տեղյակ կպահեմ»:
Ճշտեցին՝ այսինքն, քննարկումներ եղե՞լ են՝ նա պատասխանեց. «Չեմ կարող ասել, որ դա ինձ համար անակնկալ է, իսկ իմ քննարկումները բարձրաստիճան պաշտոնյաների հետ, որոնք ես մինչ այս չեմ լուսաբանել, դա նշանակում է մասնավոր խոսակցություն է եւ այս պահին էլ, իհարկե, չեմ լուսաբանի: Կարծում եմ, չպետք է լիներ ակնկալիք, որ վարչապետի հետ ունեցած իմ հանդիպումների վերաբերյալ ես այսօր կբարձրաձայնեի»:
Կարդացեք նաև
Հռիփսիմե ՋԵԲԵՋՅԱՆ
Հ. Գ. Ի դեպ, 168.am-ը փորձել էր Գագիկ Ջհանգիրյանից ճշտել՝ որքանո՞վ են հնարավոր և հավաստի իշխանությունների կողմից իր թեկնածությունը՝ որպես ՍԴ անդամ առաջադրելու մասին խոսակցությունները, ինչին նախկին զինդատախազն արձագանքել էր. «Դուք չհոգնեցի՞ք ինձ տարբեր պաշտոններ առաջարկել, ես մենակ կարո՞ղ եմ 4-5 պաշտոն զբաղեցնել»:
