Վարչապետ Նիկոլ Փաշինյանն ԱԺ-ում պարզաբանումներ էր ներկայացրել նախարարների, փոխնախարարների աշխատավարձերը բարձրացնելու հետ կապված: Մինչ այդ ԲՀԿ խմբակցության ղեկավար Գագիկ Ծառուկյանը հայտարարել էր, որ իր համար վիրավորական էր գաղտնի գործողությունը՝ աշխատավարձերը բարձրացնելու:
Այսօր ԱԺ ճեպազրույցների ժամանակ ԲՀԿ խմբակցության պատգամավորներ Իվետա Տոնոյանը հարցին՝ Փաշինյանի պարզաբանումից հետո շարունակո՞ւմ եք վիրավորված մնալ, պատասխանեց. «Պարոն Ծառուկյանի մտահոգությունը կապված է եղել բացառապես այդ աշխատավարձի գաղտնի լինելու հետ կապված: Մեր հասարակությունը վաստակել է այդ իրավունքը՝ իմանալու, թե հատկապես ո՞ր արժանիքների, ո՞ր բարձր ՕԳԳ-ի համար են այսպես շեշտակիորեն ավելացվում նախարարների կամ մարզպետների, փոխնախարարների աշխատավարձերը»:
Ըստ նրա, եթե մի քիչ շուտ պարզաբանում տային կառավարությունից, հարցն այսպես աղմուկ չէր բարձրացնի:
ԲՀԿ խմբակցության քարտուղար Արման Աբովյանն ասաց, որ իհարկե, ՀՀ-ում ամեն ինչ, «յուրաքանչյուր ընթացք» պետք է լինի բաց. «Վարչապետը վերահաստատեց իրենց դիրքը, որ միտումնավոր չեն արել: Մեզ համար ամենակարեւորը այն սկզբունքն է, որը հնչեցրեց պարոն Ծառուկյանը՝ յուրաքանչյուր ընթացքը պետք է լինի բաց, հասկանալի»:
Կարդացեք նաև
Aravot.am-ը հարցրեց՝ վարչապետն ասաց, որ նախկինում նման պրակտիկա էլի եղել է եւ գաղտնի ծրարով փող են փոխանցել նախարարներին, ԲՀԿ-ն էլ ունեցել է նախարարներ ու երեւի այդ ծրարներից օգտվել են, բա այն ժամանակ չկա՞ր նման վիրավորանք, որ դա էլ է գաղտնի արվում՝ Արման Աբովյանը պատասխանեց. «Երեւի…արդյոք…չգիտեմ…կարող ա…ասում են…խոսում են…no comment: Ի՞նչ comment տամ»: Հարցրեցինք՝ այսինքն, չե՞ն ստացել ձեր նախարարները ծրարով փող, հերքո՞ւմ եք՝ Արման Աբովյանը պատասխանեց. «Ես, այո, հերքում եմ»:
Իվետա Տոնոյանն էլ հավելեց. «Մենք խոսում ենք կառավարության եւ պետական ինստիտուտների մասին, չենք խոսում առանձին անձերի, առանձին կուսակցությունների, առանձին դեպքերի մասին: Կառավարության կազմում՝ նախարարների պարգեւատրման գործընթացում տեղի է ունեցել պարգեւատրում + աշխատավարձ ու շեշտակիորեն ավելացել են գումարները: Դրանից զատ պատմական ցանկացած տեսակի էքսկուրսների կամ լիրիկական զեղումների նպատակահարմար չենք գտնում անդրադառնալ»:
Մանրամասները՝ շուտով տեսանյութում:
Հռիփսիմե ՋԵԲԵՋՅԱՆ
