Մարալիկում Անիի համայնքապետի հրաժարականը պահանջող ցուցարարների ու «Ադեկվատի» նկարահանող խմբի միջև տեղի ունեցած միջադեպին անդրադարձել է ՀՀ պետական վերահսկողության ծառայության պետ Դավիթ Սանասարյանը։
Նա ուղիղ եթերով տեղեկացնում է, որ մեկնում է Մարալիկ՝ համայնքապետարանում ուսումնասիրությունների, այնտեղից էլ ուղիղ եթեր կմտնի։
Սակայն մինչ մեկնելը նա հորդորում է մարալիկցիներին․ «Խնդրում եմ մարալիկցներին ու ընդհանրապես որևէ մեկը, որը գալիս է Մարալիկ՝ կլինեն ադեկվատ, թե անադեկվատ, խնդրում եմ ագրեսիա չցուցաբերել, ինչքան էլ որ անադեկվատ իրենց ցուցաբերեն, խնդրում եմ թող գան, նկարեն, գնան, իրենց անելիքն անեն։ Ազատ Հայաստանում անգամ ադեկվատները խոսելու իրավունք ունեն, հանդուրժող լինենք»։
Վերահսկողության ծառայության պետը ցույց է տալիս նաև իր գլխավորած կառույցում փակցված հեղափոխական նկարները՝ մեկնաբանելով, որ սենյակներում ամենուր հեղափոխական շունչն է, և ժպիտը հաղթում է։
«Իմ նպատակն է, որ վերահսկողական ծառայության աշխատակիցները զգան քաղաքացու շունչը, հասկանան, որ իրենք աշխատում են նրա շնորհիվ, որ քաղաքացիները հեղափոխություն են իրականացրել և կոնկրետ պահանջ են դրել, և մենք ինքներս պարտավոր են այդ քաղաքացու պահանջը իրականացնել»։
https://www.facebook.com/sanasaryan/videos/10217419090207398/
Նունե ԱՐԵՎՇԱՏՅԱՆ
