Այսօր կառավարության նիստին արդարադատության նախարար Հովհաննես Մանուկյանը զեկուցեց, թե Հայաստանի օրենքներով ինչպես են պաշտպանված պաշտոնյաները:
Հովհաննես Մանուկյանի բավական երկար զեկույցից ենթադրվեց, թե Հայաստանի օրենքներն ինչ են նախատեսում զրպարտանքի եւ վիրավորանքի դեպքերում:
Զեկույցից հետո Հովիկ Աբրահամյանը դիմեց կառավարության անդամներին, հարցնելով, թե ինչ կարծիքներ կան այս առնչությամբ: ՀՀ գլխավոր դատախազ Գեւորգ Կոստանյանը ասաց, որ պաշտոնյան վիրավորանքի դեպքում կարող է դիմել դատարան:
«Հիմա ես մի տարի ա՝ ամեն նիստի գալուց, կառավարության շենքի մոտ մի անձնավորություն ինձ վիրավորում է, ես ի՞նչ պիտի անեմ»,- ասաց Գիտությունների ազգային ակադեմիայի նախագահ Ռադիկ Մարտիրոսյանը: Գլխավոր դատախազն էլ կրկնեց՝ դիմեք դատարան, իրավապահ մարմիններին:
Կարդացեք նաև
Ռ.Մարտիրոսյանն ասաց, որ դիմել է իրավապահ մարմիններին: ՀՀ Ոստիկանապետ Վլադիմիր Գասպարյանն ասաց, որ, իրոք, այդ անձին տարել են վարչություն և օրենքով սահմանված վարչական տուգանքի են ենթարկել նրան. «Պետք է հաշվի առնել, որ նա 85 տարեկան մարդ է»:
Հ.Աբրահամյանը դարձյալ հետաքրքրվեց՝ մարդուն հայհոյում են, դրա համար միայն վարչական տուգանքի են ենթարկո՞ւմ:
Ի պատասխան վարչապետի հարցման, թե ինչ կարելի է անել, ՀՔԾ պետ Վահրամ Շահինյանը ասաց, որ եթե մարդուն վիրավորում են պարբերաբար եւ հանրային վայրում, դա հասարակական կարգի կոպիտ խախտում է եւ որակվում է որպես խուլիգանություն և պետք է պատասխանատվության ենթարկել Քր.օրենսգրքի համաձայն: Ընդ որում՝ նա զարմացավ, թե տվյալ դեպքում ինչ կապ ունի տարիքը:
«Ինչքան իրավաբան, այնքան կարծիք: Հիմա ես ո՞ւմ հավատամ»,- նշեց Հ.Աբրահամյանը՝ ավելացնելով, որ այդպես էլ ոչինչ չհասկացավ:
Նելլի ԲԱԲԱՅԱՆ
