Օրերս Գորիսի նախկին քաղաքապետ Սամվել Հարությունյանը «Երկրի հարցը» հաղորդման ժամանակ մանրամասներ էր պատմում՝ Սյունիքի մարզպետ Սուրեն Խաչատրյանի հետ առնչվող տարբեր միջադեպերից: Նա նաեւ մի դրվագ պատմեց Վազգեն Մանուկյանի պահվածքի հետ կապված: 92-ին, երբ Սուրեն Խաչատրյանը պայմանագրային գումարտակի հրամանատար էր, պարտավոր էր լինել դիրքերում, քանի որ գումարտակի հրամանատարներն այդ ժամանակ դիրքերում էին, սակայն դրա փոխարեն սկսել է հետապնդել առանց իր կամքի Գորիսի քաղաքապետ դարձած Սամվել Հարությունյանին:
Վերջինիս պատմելով, քաղաքապետարանում նստած է եղել, երբ մի օր Սուրեն Խաչատրյանը «զինված հարձակում» է գործել անզեն քաղաքապետարանի վրա եւ գրավել է շենքը. «Վազգեն Մանուկյանն այդ ժամանակ պաշտպանության նախարարն էր, ուղղաթիռով եկավ հաջորդ օրն, իջավ: Եվ հետաքրքիրն այն էր, որ Սուրեն Խաչատրյանն իսկապես գրավեց այդ շենքը: Սուրեն Խաչատրյանի միակ ռազմական հաջողությունը եղել է դա՝ Գորիսի անզեն քաղաքապետարանի զինված գրավումը: Ես ուրիշ ռազմական հաջողություն չգիտեմ: Անհաջողություններ, ձախողումներ գիտեմ, երբ եղել է պայմանագրային գումարտակի հրամանատար»: Ըստ Սամվել Հարությունյանի պատմածի, Վազգեն Մանուկյանի՝ գործին խառնվելը ոչինչ չի տվել եւ միայն հետագայում՝ մի քանի ամիս հետո Գերագույն դատարանը քննել է գործը եւ բավարարվել տուգանքով:
Aravot.am-ի հետ զրույցում Վազգեն Մանուկյանը հաստատեց, որ իսկապես նման պատմություն եղել է, սակայն հերքեց, որ նա եղել է Սուրեն Խաչատրյանին հովանավորողներից մեկը. «Սամվել Հարությունյանը դեպքը ճիշտ է նկարագրել, իսկապես այդպիսի դեպք եղել է: Ես այդ ժամանակ ասեցի Լիսկային, որ պետք է 3 ամսով գնաս ռազմաճակատ՝ Ղարաբաղ՝ որպես տույժ: Հետո Վազգեն Սարգսյանը խնդրեց, որ մի ամիս հետաձգեմ, մի ամիս հետո եկավ էլի մի ամիս խնդրեց, հետո մոռացվեց այդ, այդպես էլ գնաց»:
Մենք ճշտեցինք՝ այսինքն Ձեր մեղքը դրանում չկա՞, որ միայն տույժով ազատվեց իր այդ քայլից հետո՝ նա պատասխանեց. «Հիմք չկա դրա մեջ: Ես նրան հանեցի, նրան ասացի, որ ինքը գնա Ղարաբաղ ռազմաճակատ, որ մեղքը քավի, բայց Վազգեն Սարգսյանը խնդրեց: Մի անգամ խնդրեց, երկրորդ անգամ խնդրեց, երրորդ անգամ ես արդեն պատերազմի ժամանակ ազատվեցի 93-ին: Ինձ դա էիք հարցնում, ես պատասխանեցի»:
Կարդացեք նաև
Մեր հարցին, թե ինչպե՞ս եք մեկնաբանում Գորիսի դեպքերը, որտեղի՞ց է գալիս Սուրեն Խաչատրյանի ամենաթողությունը՝ նա չցանկացավ մեկնաբանել՝ ասելով. «Ինձ ինչ վերաբերում էր, ես ասեցի: Ես հիմա չեմ ուզում գնահատականներ տալ: Ես չեմ ուզում հիմա մտնել էդ բաների մեջ: Իմ վերաբերյալ ինչ սուտ էր, ես հերքեցի, մյուս բաները ինձ չեն վերաբերվում»:
Հռիփսիմե ՋԵԲԵՋՅԱՆ
Արխիվային լուսանկարը՝ https://vazgenmanukyan.am կայքից
այ հիմա պետք է սկսել Սերժի հրաժարականը պահանջող ցույցերը քանի որ նա է Լիսկայի գլխավոր հովանավորը
իս կ ինչու չուղարկեցիք ռազմաճակատ, ումից էր լավը այդ հանցագործը. չ է որ նա իբր հրամանատար էր, իբր մասնակցել էր կռվին, և դրա համար ստացել էր մարտական խաչի շքանշան. նրան պահեցիքձեզ մոտ , լավ իմանալով նրա հանցանքների մասին. ամենամեծ դ հանցագործը նրանք են, ովքեր իմանալով ամեն ինչ , մինչև հիմա հովանավորում են նրան.