ՆԳՆ ոստիկանության պետ-ՆԳ նախարարի տեղակալ Կամո Ցուցուլյանը փետրվարի 2-ին աշխատանքային խորհրդակցություն է անցկացրել, որին մասնակցում էին Ոստիկանության գվարդիայի ստորաբաժանումների ղեկավարները։
Անդրադառնալով ոստիկանության բարեփոխումների շրջանակում ձևավորված չորս հենասյունային ուղղություններին՝ Կամո Ցուցուլյանը նշել է, որ Գվարդիայի գործառույթները չեն սահմանափակվում միայն հասարակական կարգի ու անվտանգության պահպանությամբ։ Ընդգծելով ստորաբաժանման դերը հանցագործությունների կանխման և բացահայտման գործում՝ նա փաստել է, որ թեև Գվարդիայի ձևավորումից կարճ ժամանակ է անցել, սակայն հանցավորության դեմ պայքարում արդեն իսկ արձանագրվել են էական դրական ցուցանիշներ, որոնք անհրաժեշտ է զարգացնել։
Ծառայության որակի շարունակական լավարկման նպատակով Ոստիկանության պետը հրահանգել է առաջնահերթ ուշադրություն դարձնել անձնակազմի մասնագիտական վերապատրաստմանը։ Նա ընդգծել է, որ Գվարդիայում ծառայության անցնելուց առաջ ստացած գիտելիքները պետք է լինեն հիմք, որի վրա անհրաժեշտ է շարունակաբար զարգացնել հմտությունները։
Կամո Ցուցուլյանը նաև նշել է, որ աշխատանքի հաջողությունը պայմանավորված է հասարակական անվտանգությանն ուղղված միջոցառումների ճիշտ պլանավորմամբ և ոստիկանության այլ ստորաբաժանումների հետ համակարգված ու սերտ փոխգործակցությամբ։
Կարդացեք նաև
Ոստիկանության գվարդիայի հրամանատար Հայկ Բաբայանը նշել է, որ Գվարդիայի ձևավորման առաջին իսկ օրվանից անձնակազմը պատրաստ է ներդնելու առավելագույն ջանքեր՝ ի նպաստ իրավակարգի ամրապնդման, հասարակական կարգի պահպանման և քաղաքացիների անվտանգության, իսկ բացթողումները մշտադիտարկվում են և հետևողականորեն շտկվելու են։
Խորհրդակցության ընթացքում քննարկվել են նաև հանրային վստահության ամրապնդմանը, ստորաբաժանման գործառնական հնարավորությունների կատարելագործմանը վերաբերող, ինչպես նաև ծառայողական բնույթի այլ հարցեր։
ՀՀ ներքին գործերի նախարարություն
