«Մեզ համար չափազանց կարեւոր է «Խաղողի տնկարկների ռեեստր» ծրագիրը: Ծրագրի ամենամեծ մասն ավարտել ենք, քարտեզագրել ենք խաղողի այգիները, բացի դրանց սահմանազատումները տալուց՝ ստեղծել ենք նաեւ այգիների անձնագրեր»,- «Արմենպրեսի» մամուլի սրահում կայացած ասուլիսում նշեց Հայաստանի խաղողագործության եւ գինեգործության հիմնադրամի տնօրեն Զարուհի Մուրադյանը:
Նա նշեց, որ տառաթվային տվյալներ են հավաքագրել եւ այդ ամենը մուտքագրվել է համապատասխան հարթակում, ու շուտով ունենալու են կայք. «Ամբողջ ինֆորմացիան կտեղայնացնենք, հետագայում մթերման գործընթացը կիրականացնենք հարթակի միջոցով: Սա կօգնի մեզ, որպեսզի ավելի վերահսկելի դարձնենք խաղողի արտադրության պրոցեսը, գինու եւ կոնյակի արտադրությունը, ինչը հնարավարություն կընձեռի պետական աջակցության ծրագրերն իրականացնել՝ հենվելով տվյալների վրա: Սա կնպաստի մթերման գործընթացն ավելի սահուն կազմակերպելուն, որովհետեւ ինչ-ինչ խնդիրներ են լինում, օրինակ, շատ խաղողագործներ պայմանագրեր չեն ունենում: Իսկ այս գործընթացը կօգնի ավելի պլանավորված եւ կանխատեսումով իրականացնել մթերման գործընթացը, նաեւ տեսնել, թե քանի գինեգործ չունի մթերման պայմանագիր»:
Զարուհի Մուրադյանը հույս հայտնեց, որ այս տարվա մարտին հավելվածը եւ հարթակը պատրաստ կլինեն, ծրագիրը կգործարկվի եւ պիլոտային մթերում կարվի, իսկ 2027-ին ամբողջ գործընթացը կիրականացվի հարթակի միջոցով:
Տեսանյութը՝ ստորեւ
Կարդացեք նաև
Գոհար ՀԱԿՈԲՅԱՆ
