Կենտրոնական ընտրական հանձնաժողովի նախագահ Վահագն Հովակիմյանը խորհրդարանում լրագրողների հետ ճեպազրույցում անդրադարձավ հարցին, թե արտահերթ ընտրությունների անցկացման ազդակներ կա՞ն։
«Կենտրոնական ընտրական հանձնաժողովը պատրաստվում է հերթական ընտրություններին։ Ավելին, ԿԸՀ-ն, պատրաստվելով հերթական ընտրություններին, երբեք չի կարող բացառել արտահերթ ընտրությունները, որովհետեւ դա ԿԸՀ տիրույթում չէ, դուք քաղաքական հարց եք բարձրացնում»,- ասաց Վահագն Հովակիմյանը։
Անդրադառնալով այն ահազանգին, որ Արմավիրի մարզպետն աշխատանքի ժամին հօգուտ ՔՊ թեկնածուի Վաղարշապատում քարոզչությամբ է զբաղված, ԿԸՀ նախագահն ասաց․ «Ես չգիտեմ՝ ինքն արձակուրդում է, արձակուրդում չէ։ Տվյալ դեպքում խոսքը վարչական ռեսուրսի չարաշահման մասին է, որը ենթադրում է անձի նկատմամբ որոշակի իրավական գործընթաց։ Կլինի պաշտոնական փաստարկված դիմում, ընտրատարածքային հանձնաժողովը դիմումը կքննի եւ դիմումին կտա իրավական ընթացք»։
Անդրադառնալով իր անաչառության վերաբերյալ հարցին՝ Հովակիմյանն ասաց․ «Չի կարող որեւէ ՀԿ, լրագրող կամ քաղաքական գործիչ որեւէ փաստ կամ մեղադրանք բերել, որ իմ կողմից՝ որպես ԿԸՀ նախագահի, որեւէ կողմնակալություն է դրսեւորվել։
Կարդացեք նաև
Օրինակ՝ կարող է լինել կասկած, որ ես 20 տարի լրագրող եմ եղել, վերջ։ Այսինքն՝ ձեզ համար նախկին մասնագիտությունը մեղադրանք է, որ մարդը հանցագո՞րծ է։ Կասկածն այն մասին է՝ արդյոք դուք պոտենցիալ հանցագործ եք, որովհետեւ ԿԸՀ նախագահի կողմնակալությունը հանցագործություն է։ Երբ որ դուք զուտ իմ նախկին մասնագիտության, իմ ընկերների, ընտանիքի անդամների հետ կապված իմ անձը կասկածի տակ եք դնում, ուղղակի ինձ մեղադրում եք պոտենցիալ հանցագործ լինելու մեջ։ Մարդու նախկին աշխատանքը խնդիր չէ, եթե մարդու նախկին աշխատանքը կամ պաշտոնը լինի խոչընդոտ որեւէ պաշտոնում ընտրվելու համար, դա Սահմանադրությամբ, օրենսդրությամբ կսահմանվի։
Կա սահմանադրական պահանջ, որ պաշտոնավարման ժամանակ մարդը պետք է քաղաքական զսպվածություն պահպանի։ Եթե դուք ինձ կբերեք մեկ փաստ, որ ես քաղաքական զսպվածություն եմ խախտել, որեւէ կողմնակալ գործողություն եմ արել, խնդրեմ»։
Ռոզա ՀՈՎՀԱՆՆԻՍՅԱՆ
