Գործարար Սամվել Կարապետյանի կալանքը երկարաձգվեց 30 օրով։ Նման որոշում քիչ առաջ հրապարակեց հակակոռուպցիոն դատարանի դատավոր Վահե Դոլմազյանը։
«Դատարանն այսօր արձանագրեց, որ մեղադրանքի թե՛ երկրորդ, թե՛ երրորդ դրվագը նույնիսկ հիմնավոր կասկածի շեմը չեն հաղթահարել։ Իսկ ինչ վերաբերում է կոչերին, պատկերացումը կարծես այնպիսին է, որ այս մեկ ամիսը երկարաձգվում է այն տրամաբանությամբ, որ «կա՛մ ավարտեք այս գործը, ուղարկեք դատարան, կա՛մ ընդհանրապես ավարտեք»,- ասաց Սամվել Կարապետյանի պաշտպան Արամ Վարդևանյանը՝ շեշտելով, որ այսպիսով քննիչի ներկայացրած միջնորդությունը բավարարվեց մասնակի։
Մոտ 11 ժամ տեւեց Սամվել Կարապետյանի կալանքը երկարաձգելու վերաբերյալ միջնորդության քննարկումը։ Դատարանի բակում հավաքված Սամվել Կարապետյանի ընտանիքի անդամները, ընկերներն ու կողմնակիցները «Ազատություն Սամվել Կարապետյանին», «Արդարություն» վանկարկումներով էին սպասում դատարանի որոշմանը։
Կարդացեք նաև
«Մեր պաշտպանական կողմի դիրքորոշումները ներկայացնելու փուլն ավարտեցինք: Բոլոր պաշտպաններով մանրակրկիտ ներկայացրինք մեր փաստարկները, այլ կերպ ասած հաստատապես կարող եմ ասել, որ մեր դիրքորոշումների պայմաններում, եթե ունենանք ողջամիտ հնարավորություն իրական իրավաբանության, արդարադատության, միանշանակ է, որ այս միջնորդությունը պետք է մերժվի»,- լրագրողների հետ զրույցում ասել էր գործարար, բարերար Սամվել Կարապետյանի փաստաբանական խմբի անդամ Արամ Վարդեւանյանը:
Արմեն ԴԱՎԹՅԱՆ
