Հայաստանի գեղարվեստի պետական ակադեմիան այս տարի նշում է հիմնադրման 80-ամյակը: Հոբելյանական միջոցառումների մեկնարկը տրվել է 2024–2025 ուստարվա շրջանավարտների դիպլոմների հանձնման հանդիսավոր արարողությամբ:
Միջոցառմանը ներկա են եղել ՀՀ կրթության, գիտության, մշակույթի և սպորտի նախարար Ժաննա Անդրեասյանը, ՀԳՊԱ ռեկտոր Վարդան Ազատյանը, պրոֆեսորադասախոսական կազմը, շրջանավարտներ, ուսանողներ:
Շնորհավորելով ակադեմիայի հիմնադրման 80-ամյակի առիթով՝ նախարարը նշել է. «Հայաստանի գեղարվեստի պետական ակադեմիան արվեստի ոլորտում տաղանդավոր մարդկանց ինքնարտահայտման հնարավորություն տվող ՀՀ ամենակարևոր բուհերից մեկն է: Ակադեմիայի անցած ճանապարհը թույլ է տալիս տեսնելու բուհի զարգացման հեռանկարը՝ արդեն իսկ ձևավորված ավանդույթների, փորձի ու ռեսուրսների հիման վրա»:
Ժաննա Անդրեասյանի դիտարկմամբ՝ ստեղծագործականությունը պետք է խթանվի դեռևս դպրոցից, որի նպատակով հանրակրթության բարեփոխումների շրջանակում ներդրվել է «Արվեստ» առարկան: «Շատ հաճախ արվեստը ամենադժվար հարցերի մասին խոսելու միակ լեզուն է դառնում, և այսօրվա շրջանավարտներն այդ լեզվին տիրապետողներն են: Այդ լեզուն իմանալով՝ հանրության խնդիրներից խոսելը նաև պատասխանատվություն է, որն ուղղորդում է դեպի լուծումների փնտրտուք: Վստահ եմ, որ ակադեմիան ավարտելով՝ շրջանավարտները ձեռք են բերել ոչ միայն գիտելիք, այլև արժեք ու դիրքորոշում, որոնք արվեստագետին տարբերում են մեր հանրության մեջ»,- ասել է նախարարը՝ շրջանավարտներին մաղթելով կամք ու վճռականություն հետագա գործունեության մեջ:
Կարդացեք նաև
Ժաննա Անդրեասյանը վստահություն է հայտնել, որ բուհն օրեցօր կդառնա ավելի որակյալ ու մրցունակ կրթական, հետազոտական միջավայր՝ զարգացման նոր հեռանկարներով:
ՀԳՊԱ ռեկտոր Վարդան Ազատյանը ևս շնորհավորել է շրջանավարտներին ու մաղթել բարի երթ: Անդրադառնալով ակադեմիայի գործունեությանը՝ նա նշել է, որ Հայաստանի գեղարվեստի պետական ակադեմիան և «Hosq» մշակութային հաբը ստորագրելու են համագործակցության հուշագիր, որի նպատակն է միավորել կրթությունը, արվեստը, նորարարությունն ու փորձարարական ստեղծագործական գործընթացները։
Միջոցառման շրջանակում տեղի է ունեցել ՀԳՊԱ գործունեությանը նվիրված անիմացիոն տեսահոլովակի շնորհանդես:
Ավելի քան 200 ուսանողների հանձնվել են դիպլոմներ՝ մշակույթի և արվեստի ոլորտի հատուկ հյուրերի ուղեկցությամբ:
Հոբելյանի շրջանակում Հայաստանի գեղարվեստի պետական ակադեմիան իրականացնելու է նաև այլ միջոցառումներ՝ ցուցահանդեսներ, գիտաժողովներ և համագործակցության ծրագրեր:
ՀՀ ԿԳՄՍՆ
