Եռամյա ընդմիջումից հետո Հայաստանը կմասնակցի «Միսս աշխարհ-2025» գեղեցկության համաշխարհային մրցույթին, որը կկայանա մայիսի 7- 31-ը՝ Հնդկաստանի Թելանգանա նահանգում։ Մրցույթին այս տարի մասնակցելու են 130 երկրների ներկայացուցիչներ։ Մեր երկիրը ներկայացնելու է 19-ամյա Ադրինե Աճեմյանը (լուսանկարում)։
«Միսս աշխարհ» մրցույթի Հայաստանի մասնակից Ադրինե Աճեմյանը «Սպուտնիկ Արմենիայի» մամուլի սրահում կայացած ասուլիսում նշեց, որ սովորում է Կինոյի եւ թատրոնի պետական ինստիտուտում, երգում է, 12 տարի զբաղվել է պրոֆեսիոնալ պարով:
«Կարծում եմ, որ ամենակարեւոր ուղերձն այն է, որ գեղեցկուհին պետք է լինի նաեւ տաղանդավոր, որովհետեւ մրցույթը չի սահմանափակվում միայն մասնակցի արտաքին տեսքով»,-ասաց նա:
«Միսս Երեւան Փրոդաքշնի» տնօրեն Արմինե Մուրադյանն էլ հավելեց, որ «Միսս աշխարհ» մրցույթում տարբեր փուլեր են լինելու՝ տաղանդի, երգի, պարի, իսկ Ադրինեն մասնակցելու է գրեթե բոլոր փուլերին: Նրա ձեւակերպմամբ, նման մրցույթներում որեւէ տեղ զբաղեցնելը պատիվ է ցանկացած երկրի համար:
Կարդացեք նաև
«Միսս Հայաստան -1998», «Միսս ԱՊՀ -1999» Գոհար Հարությունյանն ասաց, որ «Միսս Երեւան Փրոդաքշնը» վերցրել է էստաֆետն իր ձեռքը եւ բավական կարեւոր աշխատանք է տանում՝ գեղեցկության ոլորտը զարգացնելու ուղղությամբ, դրա համար էլ ինքը եւ գեղեցկության մրցույթներում հաղթած գեղեցկուհիները պատրաստ են աջակցելու:
Գոհար ՀԱԿՈԲՅԱՆ
Լուսանկարը՝ Միսս Երեւանի ֆեյսբուքյան էջից
