Ապրիլի 26-ին Ֆրանսիայի Գրանդ Էսթ տարածաշրջան կատարած աշխատանքային այցի շրջանակում ՀՀ սփյուռքի գործերի գլխավոր հանձնակատար Զարեհ Սինանյանը մասնակցել է Ստրասբուրգի Մոդեռն և ժամանակակից արվեստի թանգարանում կայացած «Հայ ժողովուրդը. երեկ և այսօր» խորագրով գիտաժողովին։
Միջոցառումը կազմակերպվել էր «Գրանդ Էսթի հայկական սփյուռք» ասոցիացիայի կողմից՝ «Հիշողության քարտեզ» փառատոնի շրջանակներում։
Գլխավոր հանձնակատարը գիտաժողովի ընթացքում հանդես է եկել բանախոսությամբ՝ անդրադառնալով հայկական սփյուռքի առանձնահատկություններին, սփյուռքում ազգային ինքնության պահպանման մարտահրավերներին, հայ մշակույթի զարգացման խնդիրներին, սերնդեսերունդ հայկական արժեքների փոխանցման կարևորությանը, ինչպես նաև Հայաստանի և սփյուռքի փոխգործակցության զարգացման ուղիներին։ Նա հատուկ ընդգծել է սփյուռքի դերը համահայկական միասնականության ամրապնդման գործում։
Գիտաժողովին բանախոսություններով հանդես են եկել նաև Ստրասբուրգի համալսարանի պատմության պրոֆեսոր, Հնագիտական խառը հետազոտությունների բաժնի ասոցացված հետազոտող, դոկտոր Նիկոլա Թաթեսյանը և արվեստագետ, թատրոնի դերասանուհի, գրող Կորին Զարզավաջյանը։
Կարդացեք նաև
Միջոցառմանը ներկա էին Ստրասբուրգի միջազգային հարաբերությունների հարցերով փոխքաղաքապետ Վերոնիք Բերթհոլլը, քաղաքային իշխանությունների ներկայացուցիչներ և հայկական համայնքի ավելի քան 50 ներկայացուցիչ։
Նույն օրը Զարեհ Սինանյանը մասնակցել է «Հիշողության քարտեզ» խորագրով ցուցահանդեսի բացման արարողությանը և հանդես եկել ելույթով։
Իր ելույթում գլխավոր հանձնակատարը կարևորել է մշակութային նախաձեռնությունների դերը հայ ինքնության պահպանման գործում և ընդգծել արվեստի միջոցով պատմության փոխանցման նշանակությունը։
Ցուցահանդեսի բացման խոսքով հանդես է եկել նաև Ստրասբուրգի փոխքաղաքապետ Մարինա Լաֆեյը: Ցուցահանդեսում ներկայացված էին հայաստանցի, ֆրանսիացի և Գրանդ Էսթ տարածաշրջանի հայազգի արվեստագետների աշխատանքները, որոնք ժամանակակից արտահայտչաձևերով ամփոփում էին հայկական անցյալը և ներկան։
Միջոցառման ավարտին ՀՀ սփյուռքի գործերի գլխավոր հանձնակատարը շնորհակալագրեր է հանձնել «Հիշողության քարտեզ» փառատոնի կազմակերպմանն աջակցած կամավորներին՝ ընդգծելով նրանց նվիրումն ու կարևոր ներդրումը փառատոնի հաջողության մեջ։
Սփյուռքի գլխավոր հանձնակատարի գրասենյակ
