Հայոց ցեղասպանության 110-րդ տարելիցի և Լեհաստանի խորհրդարանի կողմից Հայոց ցեղասպանության դատապարտման մասին բանաձևի 20-րդ ամյակին նվիրված միջոցառումների շրջանակում Վարշավայի համալսարանում անցկացվեց Հայոց ցեղասպանության հիշատակի օրվան նվիրված համաժողով՝ համալսարանի հայ ուսանողուհի Նունե Գևորգյանի նախաձեռնությամբ:
Դեսպան Ալեքսանդր Արզումանյանը հանդես եկավ բացման խոսքով՝ անդրադառնալով ցեղասպանության հանցագործության դեմ պայքարում ջանքերի համադրման, նոր ցեղասպանությունների և մարդկության դեմ հանցագործությունների կանխարգելման կարևորությանը:
Տեսակապի միջոցով ելույթ ունեցավ Հայոց ցեղասպանության թանգարան-ինստիտուտի տնօրեն Էդիտա Գզոյանն՝ անդրադառնալով Հայոց ցեղասպանության պատմաիրավական ասպեկտներին և գիտական ուսումնասիրություններին:
Վարշավայի համալսարանի դասախոս Դորոտա Հեյդրիխը խոսեց միջազգային իրավունքում «Ցեղասպանություն» հայեցակարգի զարգացման, դասախոս Կամիլ Շտրզեպեկը՝ հանրային միջազգային իրավունքի անարդյունավետության պատճառների մասին: Փորձագետ Վիտոլդ Ռեպետովիչը անդրադարձավ ժամանակակից աշխարհում ցեղասպանությունների ժխտողականությանը, դոկտոր Բարթլոմեյ Քշիշտան ցեղասպանության հիշողության գործիքավորմանը, Հրաչյա Բոյաջյանը՝ Լեհաստանի խորհրդարանի Հայոց ցեղասպանության դատապարտման մասին բանաձևին:
Կարդացեք նաև
Համաժողովը կազմակերպել էր Լեհաստանի Հայ երիտասարդության կազմակերպությունը՝ Լեհ-Հայկական հիմնադրամի աջակցությամբ և Լեհաստանում Հայաստանի սփյուռքի գործերի հանձնակատարի, Վարշավայի Համալսարանի Մարդու իրավունքների և հումանիտար ճգնաժամերի գիտական խմբակի հետ համագործակցությամբ։
ԼԵՀԱՍՏԱՆՈՒՄ ՀՀ ԴԵՍՊԱՆՈՒԹՅՈՒՆ
