Հայոց Ցեղասպանութեան հարիւրամեակը կարելի է անկիւնադարձ մը համարել արդարութեան հասնելու մեր հաւաքական պայքարին մէջ. պայքար մը, որ կը շարունակուի, մինչ Թուրքիա յամառօրէն կը շարունակէ իր առաւել քան հարիւրամեակ մը առաջ սկսած ուրացման քաղաքականութիւնը։
Հանգուցեալ Ֆրանսիս պապն էր, որ Վատիկանի մէջ տեղի ունեցած Ցեղասպանութեան հարիւրամեակին նուիրուած պատարագին ընթացքին շեշտեց Ցեղասպանութեան միջազգային ճանաչման կարեւորութիւնը՝ աւելցնելով, որ ուրացման քաղաքականութիւնը խոչընդոտ է մարդկութեան յառաջդիմութեան առջեւ եւ դուռը բաց կը պահէ այդպիսի ոճիրներու կրկնութեան դիմաց։
Երկուշաբթի օր իր մահկանացուն կնքած Ֆրանսիս պապը Ս. Զատիկի օրը իր վերջին պատգամին մէջ անգամ մը եւս աղօթեց Հայաստանի եւ Ատրպէյճանի միջեւ խաղաղութեան համար, ու վերահաստատեց 2016ին Ծիծեռնակաբերդէն եւ Արարատի շուքին տակ կատարած իր յայտարարութիւնը։
Հարիւրամեակը նաեւ առիթ մը հանդիսացաւ Հայոց Ցեղասպանութեան ճանաչումը եւ վնասուց հատուցում ապահովելու պայքարին շուրջ ի մի բերելու աշխարի հայութիւնը, որ փաստեց, թէ հակառակ իրեն դէմ ծառացած մարտահրաւէրներուն, կը շարունակէ իր բարգաւաճումը։
Կարդացեք նաև
Այս իրողութիւնը յստակօրէն ի յայտ եկաւ Լոս Անճելըսի մէջ, ուր 166,000 հայորդիներ մասնակցեցան 6.5 մղոննոց «Արդարութեան քայլարշաւ»ին, քաղաքին ամէնէն բանուկ փողոցներռւն ուշադրութիւնը գրաւելով եւ շեշտելով, թէ զոհերը ոգեկոչելու կողքին կենսական է նաեւ արդարութիւն պահանջելը։
Այժմ, ժամանակը հասած է վերջին տասնամեակի իրադարձութիւններու հաշուետուութեան եւ յատկապէս քննելու այն դասերը, զորս չկրցանք սորվիլ, որուն պատճառով հասած ենք ներկայ կացութեան եւ Արցախի մէջ կրկնուած ցեղասպանութեան եւ ցեղային զտումին։
Կարելի է ըսել, որ արդարութեան հասնելու եւ Միացեալ Նահանգներու կողմէ Հայոց Ցեղասպանութեան ուշացած ճանաչումը՝ 2021ին, մղեցին մեր թշնամիները՝ Թուրքիան եւ Ատրպէյճանը, հայութեան դէմ նոր ցեղասպանութիւն մը իրականացնելու, մինչ աշխարհը անգամ մը եւս կրաւորական կեցուածք որդեգրեց՝ ուրացման նոր ալիքի մը առիթ ընծայելով։
Սակայն, առաւել մտահոգիչ է այն, որ կրաւորականութեան եւ ուրացման այս արշաւը որդեգրուած է նաեւ Հայաստանի իշխանութիւններուն կողմէ, որոնք դժուար տեսանելի խաղաղութեան յոյսերու սիրոյն հայոց պատմութիւնը նսեմացնելու արշաւի մը նախաձեռնած են։ Միայն անցեալ շաբաթ էր, որ արտաքին գործոց նախարար Արարատ Միրզոյեան յայտարարեց, թէ մինչ կը յարգէ մեր նախահայրերը, իր համոզումը այն է, որ պէտք է այլեւս «յառաջ շարժինք»։ Անոր յայտարարութիւնը արձագանգ մըն էր Ցեղասպանութեան պատմութիւնը վերանայելու՝ վարչապետ Նիկոլ Փաշինեանի խօսքերուն։
Հոդվածն ամբողջությամբ՝ «Ասպարեզ» թերթի այս համարում
