Արթիկի համայնքապետարանը 2022 թվականին 2.7 մլն դրամի գնման երկու պայմանագիր է կնքել փոխհամայնաքապետ Արման Աջամօղլյանի հետ կապվող «Արմինե Հակոբյան» ԱՁ-ից (անհատ ձեռնարկատեր)։
Այս ԱՁ-ի հետ է կապվում նաև համայնքապետարանի ֆինանսատնտեսական, եկամուտների հաշվառման և հավաքագրման բաժնի գլխավոր մասնագետ Մարիամ Փանոյանի անունը, որը, ըստ FIP.am-ի տեղեկությունների, համատեղում է համայնքային ծառայության ու ԱՁ-ի հաշվապահի աշխատանքները։
«Փաստերի ստուգման հարթակն» ուսումնասիրել է ԱՁ-ի գործունեությունն ու կապերը համայնքապետի տեղակալի ու աշխատակցի հետ, ինչպես նաև համայնքի հետ կնքված գնման պայմանագրերը։
ԱՁ-ն գրանցվել է Աջամօղլյանի՝ համայնքում պաշտոն զբաղեցնելուց ամիսներ հետո
ՀՀ արդարադատության նախարարության էլեկտրոնային E-register.am համակարգից տեղեկանում ենք, որ «Արմինե Հակոբյան» ԱՁ-ն հիմնադրվել է 2022 թվականի փետրվար ամսին․ այն գրանցված է Արթիկի Շինարարների փողոց 9, 37 հասցեում։
Կարդացեք նաև
ԱՁ-ն, սակայն, ձեռնարկատիրական գործունություն է ծավալում համայնքի Գարեգին Նժդեհի ⅓ հասցեում՝ որպես սննդի և ժամանցի «Պիցցա-Նիցա» անունով հաստատություն։
Արմինե Հակոբյանը ներկայացված է որպես ԱՁ հիմնադիր և տնօրեն։
Հատկանշական է, որ ԱՁ-ի գրանցումից ամիսներ առաջ՝ 2021 թվականի նոյեմբերին, Արման Աջամօղլյանը ՀՀ վարչապետ Նիկոլ Փաշինյանի որոշմամբ նշանակվել է Արթիկ համայնքի ղեկավարի ժամանակավոր պաշտոնակատար։
Այդ տարի համայնքում տեղի են ունեցել ՏԻՄ ընտրություններ, որոնցում հաղթել է կառավարող «Քաղաքացիական պայմանագիր» կուսակցությունը. համայնքի ղեկավար է դարձել կուսակցության թեկնածու Անանիկ Ոսկանյանը, իսկ Աջամօղլյանը նշանակվել է համայնքապետի տեղակալ։
Գնման պայմանագրեր՝ ճոխ հյուրասիրությունների համար
Համայնքապետարանն արդեն 2022 թվականի հուլիս ամսին համայնքի կարիքների համար ճաշկերույթների և ֆուրշետների կազմակերպման ծառայության մատուցման պայմանագիր է կնքել «Արմինե Հակոբյան» ԱՁ-ի հետ՝ 1․8 մլն դրամ արժեքով։
«Արմինե Հակոբյան» ԱՁ-ի հետ երկրորդ պայմանագիրը համայնքապետարանը կնքել է 2022 թվականի դեկտեմբերին, այս անգամ ամանորյա միջոցառման համար հյուրասիրության ծառայության նպատակով՝ 900,000 դրամ արժեքով։
Նանե ՄԱՆԱՍՅԱՆ
Հոդվածն ամբողջությամբ՝ «Փաստերի ստուգման հարթակում»
