Արտակարգ եւ լիազոր դեսպան Կարեն Միրզոյանի դիտարկմամբ՝ ապրիլի 24-ին Թուրքիայի նախագահ Էրդողանը հայոց ցեղասպանության վերաբերյալ արդեն մոտ տասը տարի է՝ նույն բովանդակությամբ ուղերձներ է հղում:
«Այսինքն, եթե ամփոփենք, արձանագրում է՝ այդ շրջանում եղել են ծանր դեպքեր, զոհեր հավասարապես կրել են երկու կողմերը, բայց դա երբեք չի եղել ցեղասպանություն:
Այս ամենը հաշվի առնելով՝ հարց տալ, թե ով ումից է այդ գաղափարները ընդօրինակել՝ պարզ է: Մի տարբերություն կար երկու ուղերձների միջեւ. մեր ուղերձում բացակայում էր հիշատակումը թե ով է կատարել ցեղասպանությունը: Կողմնակի դիտորդի մոտ կարող է տպավորություն ստեղծվել, որ հայերը 110 տարի առաջ իրենք իրենց ցեղասպանել են, պահը եկել է ճիշտ գնահատել՝ ինչու են իրենք իրենց ցեղասպանել: Չեմ ուզում ավելի հեռու գնացող գնահատականներ տալ: Ակնհայտ է, որ մեր ուղերձում պարունակվող այդ գաղափարները որեւէ առնչություն չունեն պատմական իրողությունների ու այն բազմաթիվ մարտահրավերների հետ, որոնց հետ մեր երկիրն առնչվում է».-այսօր «Հայկական հարցը արդի փուլում. քաղաքական, իրավական եւ դիվանագիտական հեռանկարներ» խորագրով համաժողովից առաջ լրագրողներին ասաց Կարեն Միրզոյանը՝ համեմատելով Էրդողանի ու Նիկոլ Փաշինյանի ապրիլքսանչորսյան ուղերձները:
Պարոն Միրզոյանն ասաց, որ չի ընդունում այն պնդումները, թե մենք այսօր այնքան ծանր վիճակում ենք, որ այլ ելք չունենք, քան թուրքական պահանջների հլու հնազանդ կամակատար դառնալը. «Մենք ունենք հսկայական ռեսուրսներ, այո՛, պարտվեցինք 44 օրյա պատերազմում, բայց չենք կապիտուլացվել: Այդ զինադադարի մասին պայմանագիրը վերածել կապիտուլացման պայմանագրի, անթույլատրելի է: Մեր պետականության, ժողովրդի ռեսուսրները անսպառ են: Անհրաժեշտ ցանկության պարագայում հնարավոր է դիմակայել ցանկացած մարտահրավերի »:
Կարդացեք նաև
Արփինե ՍԻՄՈՆՅԱՆ
Լուսանկարը՝ Newmag-ի
