«Քանի նոր վերջերս էշը Սերժ Սարգսյանի թեթև ձեռքով դարձավ որպես քաղաքական տերմինաբանություն, էսպես ասենք՝ Ադրբեջանում և Թուրքիայում էշին ոչ ավանդական եղանակով են ուզում օգտագործել, Բրյուսելից էդ էշին ասում են՝ «էշ մի սատկի, գարուն կգա», Վաշինգտոնում էշը պահանջարկ չունի, Մոսկվայում էլ տրամադրությունից կախված՝ կամ «իշակ» են ասում, կամ «օսլիկ», հարցին՝ ինչպե՞ս եք գնահատում ՀՀ-ում ստեղծված իրավիճակը, իր գործով դատական նիստից հետո դատարանի դահլիճում լրագրողների հետ կարճ ճեպազրույցում այսպես պատասխանեց ՀՀԿ փոխնախագահ Արմեն Աշոտյանը։
Նրա գնահատմամբ՝ այս ապրիլի 24-ը ամոթի ապրիլի 24 էր․ «Ե′վ Հայոց ցեղասպանության միջազգային ճանաչման, և′ մեզ ներկայացնող մարդու ուղերձի, և′ հոգեբանական վիճակի առումով խայտառակ վիճակ էր։ Եվրամիության բարձր ներկայացուցիչ Կալլասն այսօր գնում է Բաքու։ Ավելի տխմար օր գտնել ու գնալ Բաքու, դժվար էր պատկերացնել։ Կհիշե՞ք՝ ԵՄ բարձրաստիճան պաշտոնյաներից ո՞վ ցավակցեց մեզ երեկ։ Ոչ մեկը, այն դեպքում, երբ ԵՄ 17 երկրները ճանաչել են Հայոց ցեղասպանությունը, իսկ CEPA-ի 6-րդ հոդվածով ամրագրված է, որ կողմերը պարտավոր են ցեղասպանության հանցագործության դեմ միասնական պայքարել»։
Տաթև ՀԱՐՈՒԹՅՈՒՆՅԱՆ
