ՀՀ Գեղարքունիքի մարզի առաջին ատյանի ընդհանուր իրավասության դատարանի Սևան քաղաքի նստավայրում Ազատ գյուղի զինվորական կացարանի հրդեհի գործով դատական նիստին այսօր գործով վկաները չէին ներկայացել:
Վկաներից Արգամ Գեւորգյանը դատական նիստի նշանակված ժամից մոտ մեկ ժամ անց էր դատարանին տեղեկացրել իր չներկայանալու հանգամանքները: Դատարանը անհարգալից վերաբերմունք գնահատեց վկայի այս քայլը ու որոշեց՝ հաջորդ դատական նիստին հարկադրաբար նրան ներկայացնել դատարան, որի կատարումը հանձնարարեց Ռազմական ոստիկանության պետին:
Դատարանը որոշեց, որ մյուս վկային նույնպես հարկադրաբար պետք է ներկայացնեն դատարան, այդ կատարումն էլ հանձնարարվեց նրա բնակության վայրի համայնքային ոստիկանությանը:
Դատարանին տեղեկություն փոխանցվեց դատավարական կողմից, որ իրենց չճշտված տեղեկությունների համաձայն՝ հնարավոր է՝ վկա Արգամ Գեւորգյանը հաջորդ նիստին էլ չներկայանա, քանի որ Հունաստանում նախատեսված զորավարժությունների է մասնակցելու:
Կարդացեք նաև
Դատական նիստն էլ այսօր որոշվեց հետաձգվել վկաների չներկայանալու պատճառով:
Դատարանի այս որոշումը հունից հանեց զոհված զինվորների հարազատներին:
-Մենակ մեր վրա է ձեր ուժը պատում, նկատողություն եք անում, թե դատարանն եկավ, չկանգնեցինք: Իսկի դատարան էլ չեն գալիս, տնաշեններ: Ինչի մի հատ օրենք չեք հանում, օրենքները մենակ մե՞ր վրա են կիրառում, երեխեքին տարան, սպանեցին,- արձագանքեց զոհվածների հարազատներից մեկը:
-Այ, էդպես էլ բանակ են կառավարում,- շարունակեց մեկ այլ ծնող: Ծնողները՝ իրար հերթ չտալով, իրենց դժգոհությունը հայտնեցին դատարանին ու հեռացան:
Հիշեցնենք, որ ըստ ՀՀ քննչական կոմիտեի հաղորդագրության` կապիտան Եղիշե Հակոբյանը Ազատ գյուղի կացարան 5 լիտրանոց տարայով ավտոբենզին է բերել` այն որպես կպչան օգտագործելու համար, բենզինը լցրել վառարանի մեջ, որն էլ 15 զինծառայողի կյանք խլած հրդեհի պատճառ է դարձել։
Արփինե ՍԻՄՈՆՅԱՆ
