«Հիմա ինձ համար անհասկանալի է։ Տեսնում եմ՝ երեկ գիշերվա կրակոցները իշխանական մամուլը կապում են դրոշների հետ։ Քիչ մնա՝ կապեն հուշահամալիր այցելության հետ։ Գիտենք արդեն շուրջ երկու շաբաթից ավելի է գրեթե ամեն գիշեր կրակում են»,- Ծիծեռնակաբերդի հուշահամալիրում լրագրողների հետ ճեպազրույցում ասաց «Լուսավոր Հայաստան» կուսակցության նախագահ Էդմոն Մարուքյանը։
Նա, հղում կատարելով ՀՀ վարչապետ Նիկոլ Փաշինյանի՝ Հայոց ցեղասպանության օրվա ուղերձին, նկատեց․ «Ուշադրություն դարձրեք, որ Թուրքիա անունը գոյություն չունի՝ միայն Օսմանյան կայսրություն»։ Լրագրողների դիտարկմանը՝ գուցե դրանով դիվանագիտության տե՞ղ են թողնում, Էդմոն Մարուքյանն արձագանքեց․ «Որևէ անատամ քայլ, ոչ թիրախային մոտեցում մեր հակառակորդի, թշնամու մոտ չի առաջացնելու զղջում կամ հավելյալ հարգանք մեր նկատմամբ։ Օրինակ, եթե դա արվում է, որ սահմանը բացեն, չեն բացելու դրա համար։ Խոսքը պատմական գնահատական տալու մասին է։ Եթե հույսն այն է, որ մենք կասենք՝ Օսմանյան կայսրություն, այսօրվա Թուրքիայից բան չենք ակնկալի, և դրա արդյունքում կխաղաղվեն մեր հարևանները և թշնամիները, ապա նշեմ, որ այդ ռազմավարությունը չի գործում»։
Լրագրողները հետաքրքրվեցին՝ ինչպե՞ս եք պատկերացնում Նիկոլ Փաշինյանին հեռացնելը, քանի որ ընդդիմադիր ուժերը խոսում են նաև իմպիչմենտի մասին, Էդմոն Մարուքյանը պատասխանեց․ «Նիկոլի Փաշինյանի հեռացման հնարավորությունը, ինչպես բացվել էր 2021-ին, բացվելու է մեկ էլ հաջորդ ընտրությունների ժամանակ։ Այս պահին արտահերթ ընտրությունների հնարավորություն ես չեմ տեսնում։ Նիկոլ Փաշինյանի հեռացումը տեսնում եմ հերթական ընտրությունների միջոցով։ Փորձը ցույց է տվել, որ փողոցային պայքարն ավելի է ուժեղացրել իշխանության դիրքերը։ Իմպիչմենտի վերջնաժամկետը հունիս-հուլիս ամիսն է։ Մինչ այդ ցանկացած պատգամավոր կարող է պատրաստել այդ նախագիծը և շրջանառել հարցը։ Անընդհատ քննարկել ու չշրջանառել, ես դա չեմ հասկանում»։
Կարդացեք նաև
Տաթև ՀԱՐՈՒԹՅՈՒՆՅԱՆ
