Ես 2019-ի սեպտեմբերից ձեռնարկում եմ այդ քայլերը․ Ծիծեռնակաբերդի բարձունքում լրագրողների հետ զրույցում ասաց «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը՝ պատասխանելով Նիկոլ Փաշինյանին եւ ՔՊ-ին իշխանությունից հեռացնելու մասին լրագրողի հարցին՝ հիշեցնելով, որ իր հրաժարականը ներկայացնելիս նաեւ հստակ խոսել է դրա պատճառների մասին։
«Այն ժամանակ չեմ տեսել, որ նման քայլեր իրագործվում են, բայց որպես մարդ, որը տիրապետում է մի քիչ ավելի շատ տեղեկատվության ու վերլուծելու ունակություն ունի, հասկացել եմ, որ այո, մեր երկիրը գնալու է այն ճանապարհով, որով գնացել է։ Բայց անգամ ամենավատ երազում չէի կարող պատկերացնել, որ հասնելու ենք այս իրավիճակին, որն ունենք այսօր»,- մանրամասնեց նա։
Լրագրողի ճշտող հարցին՝ ինչո՞ւ չի ստացվում, ինչո՞ւ ընդդիմադիրների նախաձեռնած քայլերն անարդյունք են անցնում, նա պատասխանեց․ «Դա ամենակարեւոր հարցն է, որ ոչ միայն ինքս ինձ պետք է տամ, այլ հազարավոր քաղաքացիներ, որոնք նույն նպատակն ունեն։ Չստացվելու պատճառներից մեկն էլ այն է, որ Փաշինյանն ու իր իշխանությունը ցանկացած քայլի դիմում են իշխանությունը պահելու համար, ցանկացած քայլի՝ ապօրինությունների, սադրանքների, մարդկանց ձերբակալությունների, ուժ կիրառելու, ամեն-ամեն ինչ անում են, որ իշխանությունը հանկարծ չկորցնեն։ Այս մարդիկ իշխանությունը համարում են իրենց անվտանգության երաշխիքը։
Երկրորդ՝ ամենակարեւորը, որ իրենք վայելում են իշխանությունը, ոչ թե ծառայում են ժողովրդին, ուստի նրանց համար իշխանություն կորցնելը հավասար է մահվան, քանի որ ոչ մի բան չունենալով, ոչ ոք լինելով՝ այսօր նրանք հարստացել են, ունեն լծակներ, մեծ պահակախմբեր, որոնց ուղեկցությամբ շրջում են։ Բայց դա մեզ չպետք է հուսահատեցնի։ Պայքարելու ենք, բայց եկեք ժամկետներ չնշենք»։
Կարդացեք նաև
Արթուր Վանեցյանը հստակեցրեց՝ չբացառելով փողոցային պայքարն ու իմպիչմենտի կիրառմամբ Նիկոլ Փաշինյանի հեռացումը, իր ղեկավարած կուսակցությունը պետք է պատրաստվի 2026 թվականի խորհրդարանական ընտրություններին։
Պատասխանելով օրվա խորհրդին վերաբերվող հարցին էլ, Արթուր Վանեցյանն ասաց․ «Իշխանություններն իրենց կեղծ թեզերով, թուրք-ադրբեջանական տանդեմին հաճոյանալու նպատակով փորձում են Ցեղասպանության միջազգային ճանաչման հարցը հանել մեր օրակարգից»։
Մանրամասները՝ տեսանյութում
Նելլի ԳՐԻԳՈՐՅԱՆ
