Ապրիլի 24-ին ՌԴ դեսպան Սերգեյ Կոպիրկինը և դեսպանատանը պաշտպանական կցորդ Ա.Բ. Գորյայնովը մասնակցել են Օսմանյան կայսրությունում Հայոց ցեղասպանության զոհերի հիշատակին նվիրված արարողությանը` Ծիծեռնակաբերդի հուշահամալիրում ծաղկեպսակ և ծաղիկներ դնելով Անմար կրակի մոտ։
«Սգում ենք հայ ժողովրդի հետ միասին՝ Օսմանյան կայսրությունում Հայոց ցեղասպանության զոհերի հիշատակի օրվա կապակցությամբ»,- նշված է ՀՀ-ում ՌԴ դեսպանության էջում:
Ռուսաստանը եղբայրական հայ ժողովրդի վիշտը միշտ ընկալել է որպես սեփականը. արտաքին քաղաքականության ընթացիկ հարցերի վերաբերյալ ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան:
Ռուսաստանն աշխարհի առաջին երկրներից էր, որը օրենսդրական մակարդակով դատապարտեց ցեղասպանությունը, նշել է Զախարովան։
Կարդացեք նաև
«Ապրիլի 24-ին լրանում է 20-րդ դարի առաջին ցեղասպանության 110-րդ տարելիցը։ Մոսկվայի դիրքորոշումն այս իրադարձությունների վերաբերյալ հայտնի է. այն հիմնված է հումանիստական ավանդույթների վրա։ Արդեն 1915 թվականին ռուսական դիվանագիտության ղեկավար Սերգեյ Սազոնովի նախաձեռնությամբ միջազգային հանրության առաջատար անդամները կատարվածը որակեցին որպես մարդկության դեմ հանցագործություն»,- ասել է ՌԴ ԱԳՆ պաշտոնական ներկայացուցիչը։
