«Այդ միջադեպից առաջ մենք հայտարարել էինք, որ ԱԺ մուտք ենք անում օրենքի նախագիծ ցեղասպանության ժխտումը, նսեմացումը քրեականացնելու համար։ Հավանաբար իրենց ռեակցիան պայմանավորված էր դրանով, որովհետև դրանից հետո սկսվեց»,-լրագրողների հետ ճեպազրույցում անդրադառնալով ՀՀ ԱԺ-ում տեղի ունեցած ծեծկռտուքին, ասաց «Հայաստան» խմբակցության պատգամավոր, ՀՅԴ Հայաստանի գերագույն մարմնի ներկայացուցիչ Իշխան Սաղաթելյանը։
Ըստ նրա՝ առհասարակ ԱԺ նախագահը շարունակում է չհասկանալ՝ որտեղ է գտնվում․ շարունակ սադրանքով է զբաղված։ Հարցին՝ այսինքն՝ Ալեն Սիմոնյա՞նն է սադրել, Իշխան Սաղաթելյանը պատասխանեց․ «Հերթական անգամ»։ Հարցին՝ իսկ Վահե Ղալումյա՞նն ինչ դերակատարություն է ունեցել, պատգմավորը պատասխանեց․ «Ընդհանրապես իր դերակատարությունը չեմ հասկանում խորհրդարանում, բացի Նիկոլի սանիկը լինելուց»։
Կարդացեք նաև
Լրագրողները հստակեցրին՝ ընդամենը նախագիծ եք առաջարկել, որն առաջացրել է իշխանական գործընկերների վրդովմո՞ւնքը, Իշխան Սաղաթելյանը պատասխանեց․ «Տպավորությունը դա էր։ Իրենց՝ այս շաբաթվա լարվածությունը, այս ուրացումը՝ Հայոց ցեղասպանության 110-րդ տարելիցի օրերին, պայմանավորված է դրանով, ու նաև նրանով, որ հասարակական, քաղաքական, հանրային արձագանք կա ցեղասպանության թեմայով։ Մենք օրենքի նախագիծը բերել ենք խորհրդարան, որ դա դառնա քննարկման առարկա։ Իրենք շարունակաբար ժխտում են, բայց տարբեր մանիպուլյացիաներով խաբում են ժողովրդին։ Հետևաբար` առաջիկա մեկ ամսվա ընթացքում հայտնի կլինի օրվա իշխող քաղաքական ուժի ուրացման քաղաքականությունը, եթե իրենք կողմ չեն քվեարկի։ Իսկ իրենք կողմ չեն քվեարկի, բնականաբար։ Բայց դա պետք է մտնի խորհրդարան»։
Փաստմանը՝ իշխանական պատգամավորները քննադատում են Դաշնակցությանը, հիշեցնում, որ երիտթուրքերի հետ են համագործակցել և այլն, Իշխան Սաղաթելյանն արձագանքեց․ «Դա բնական է։ Գոյություն ունի թուրքական խամաճիկ կառավարություն՝ ազգային, հայկական շահերից հեռացած միավոր։ Դաշնակցությունն այս իշխանության խորքային գաղափարական հակառակորդն է»։
Լրագրողների փաստմանը՝ կռվի ամենաթեժ պահին ՔՊ խմբակցության քարտուղար Արթուր Հովհաննիսյանն ասում է՝ «այ պոռնիկներ» և հարցին՝ ո՞նց եք թույլ տալիս, Իշխան Սաղաթելյանն այսպես արձագանքեց․ «Դրանք տղամարդկային տարրական բան էլ չունեն։ ՊՊԾ-ի զորքին հրահանգ են տալիս դռան հետևում սպասել, հենց ասենք՝ կմտնեք, մարդկանց հանձնարարություն են տալիս։ Մի օր զրկվելու եք ՊՊԾ-ից, ու էն ժամանակ, եթե մեջներդ տղամարդ կա, ասածներին պատասխան կարո՞ղ եք տալ, կտեսնենք։ Հիմա թաքնվել այս համազգեստավոր մարդկանց հետևում, տղամարդ ձևանալ, ճիշտ չէ»։
Տաթև ՀԱՐՈՒԹՅՈՒՆՅԱՆ
