«Հայաստան» խմբակցությունն ԱԺ է ներկայացրել օրենքի նախագիծ, որով նախատեսվում է քրեական պատասխանատվություն սահմանել Հայոց ցեղասպանության ժխտման կամ նսեմացման համար:
ՀՀ Ազգային Ժողովի «Քաղաքացիական պայմանագիր» խմբակցության ղեկավար Հայկ Կոնջորյանն առիթն օգտագործեց դաշնակցությանը հերթական անգամ քննադատելու համար:
«Հայոց Ցեղասպանությունից ընդամենը 3 տարի անց` 1918 թվականի հունիսի 4-ին, Դաշնակցությունը Թուրքիայի հետ կնքեց հաշտության պայմանագիր։ Պայմանագրի վերնագիրն էր՝ «Հաշտության և բարեկամության պայմանագիր Օսմանյան կայսերական կառավարության և Հայաստանի Հանրապետության միջև»։ Հայկական կողմից պայմանագիրը ստորագրել էին դաշնակցականներ Հովհաննես Քաջազնունին ու Ալեքսանդր Խատիսյանը։
Ցեղասպանությունից ընդամենը 6 տարի անց՝ 1921 թվականին, դաշնակցական, Առաջին Հանրապետության վարչապետ Սիմոն Վրացյանը հեռագիր ուղղեց Անկարա, Ազգային Մեծ ժողովին, որտեղ ասվում էր, որ «Հայաստանը ձգտում է խաղաղ և բարեկամական հարաբերություն թուրքերի հետ»,- հիշատակեց նա:
Կարդացեք նաև
ԱԺ ամբիոնից Հայկ Կոնջորյանը հայտարարեց. «Դուք ուրացել եք դաշնակցությանը, ուրացել եք Սիմոն Վրացյանին, դուք ուրացել եք Քաջազնունուն, ուրացել եք Խատիսյանին, հիմա հիմնավորեմ, թե ոնց եք ուրացել:
Ցեղասպանությունից ընդամենը 3 տարի անց դաշնակցությունը գնում է Թուրքիայի հետ պայմանագիր է կնքում հաշտության եւ բարեկամության մասին:
Փաստորեն դուք դա ուրացում չեք համարում, իսկ հիմա եկել եք 110 տարի անց պարոն Մինասյանը եւ դուք ուզում եք բերել նախագիծ՝ Ցեղասպանության ուրացումը քրեական պատասխանատվություն սահմանելու համար: Բա դուք համարում ե՞ք, որ Խատիսյանը, Քաջազնունին կամ Վրացյանը ուրացող են: Եթե Դաշնակցության ավանդույթը պահում եք, մինչեւ վերջ պահեք».-ասաց նա՝ դիմելով «Հայաստան» խմբակցության դաշնակցական պատգամավոր Գեղամ Մանուկյանին:
