Այսօր վաղ առավոտից Պռոշյանի եւ Քասախի բնակիչները կրկին փակեցին Երեւան-Աշտարակ մայրուղին:
Բնակիչները պահանջում են երթուղի մտցնել իրենց համայնքները սպասարկող25 եւ 59 համարի ավտոբուսները:
Կարդացեք նաև
Հիշեցնենք, որ Պռոշյանի բնակիչները պայքարում են 25 համարի ավտոբուսի երթուղու կրճատման եւ նոր՝ ավելի թանկ երթուղի մտցնելու դեմ։ Նոր երթուղին սպասարկելու է «Մուլտիտրանսպորտ» ընկերությունը՝ 250 եւ 200 դրամ արժեքով, եւ այս պարագայում տրանսպորտը հասնելու է մինչեւ Ֆիզիկայի ինստիտուտ: Բացի դրանից, վերջին տրանսպորտը քաղաքից շարժվելու է 19:30-ին։ Ցուցարարները նշում են, որ բացի թանկացումը, մեծ դժվարությամբ աշխատանքի հասնելուն զուգահեռ՝ եւս մեկ խնդիր է լինելու երեկոյան ժամերին տուն հասնելը:
Պռոշյանի բնակիչ Սերգո Մուրադյանը Aravot.am-ին ասաց, որ իշխանությունները՝ լսելով նախորդ օրվա իրենց հայտարարությունը, որ այսօր փակելու են մայրուղին, նշված ավտոբուսները երեկ ու այսօր թողել են գծում՝ չնայած արդեն նախապես որոշում կար, որ այսօրվանից 25 եւ 59 համարի ավտոբուսները նախկին Պաշտպանության նախարարության շենքի մոտից շրջադարձ էին կատարելու ու վերադառնային Երեւան:
Այսօր մայրուղին փակած բնակիչները պահանջեցին մարզպետին կամ իշխանության այլ ներկայացուցչի գալ իրենց մոտ ու պատասխան տալ իրենց կայացրած որոշումների վերաբերյալ:
«Պռոշյանի հարցը մասամբ է լուծվել, եղել է կառավարության շենքի ներսում: Փափուկ բարձ դնելով մեր գլխի տակ՝ ասացին, որ 25-ի վերջնակետը կլինի նախկին ՊՆ-ի մոտ, այդտեղից ավտոբուսը՝ շրջադարձ կատարելով կվերադառնա: Բացատրեցինք, որ մայթեզր չկա այդ հատվածում, առաջարկեցինք 300 մետր առաջանալ Պռոշյանի կամարի մոտ, այդտեղ էլ շրջադարձի տեղ կա: Մեզ մարդավարի խոստացան հարցը լուծել: Այսօր կանգնել ենք փաստի առաջ, խաբեցին մի ողջ երկու համայնքի ժողովրդի: Այս երկու համայնքն այն համայնքներն են, որ այնքան զոհեր ու հերոս տղաներ ունի տված: Իշխանությունները թող զարթնեն քնից, մարդ գտնվեն: Հերիք եղավ: Այսօրվա իշխանությունը ճանապարհ փակելով է, չէ՞, իշխանության եկել: Այնպես չանեն, որ ճանապարհ փակելով էլ այդ իշխանությունները ռադ լինեն, հերիք է»:
Մեկ այլ բնակիչ էլ հարցրեց՝ արդյոք բարելավվե՞լ է այն խոցելի խավերի կյանքը, որոնք նվազագույն աշխատավարձ ու նվազագույն կենսաթոշակ են ստանում, իսկ հանրային տրանսպորտից օգտվում են հենց այդ խավի բնակիչները:
Քասախի ու Պռոշյանի բնակիչները նաեւ այսօր հայտարարեցին, որ այսուհետեւ միասին են գործելու ու միասնական: Դեպքի վայրում մեծաթիվ ոստիկաններ էին հավաքվել՝ բնակիչներին տեղեկացնում էին ազատել ճանապարհը, չխոչընդոտել այլ քաղաքացիների ազատ տեղաշարժի իրավունքը՝ հակառակ դեպքում կկիրառեն ուժ:
Ի դեպ, այսօր ցույցի դուրս եկած մի շարք քաղաքացիներ լրագրողներին պատմում էին, որ իրենց զանգերով հորդորել են այսօր դուրս չգալ փողոց՝ սպառնալով ոստիկանների կողմից բռնի ուժով ճանապարհները բացելու որոշմամբ:
Արփինե ՍԻՄՈՆՅԱՆ
