Մոլդովայի մայրաքաղաք Քիշնեւում ավարտվեց ծանրամարտի Եվրոպայի առաջնությունը: Եվ ավարտվեց տղամարդկանց գերծանր քաշային կարգում Հայաստանի գյումրեցի դյուցազն Վարազդատ Լալայանի փառահեղ հաղթանակով:
Իր նախնական մոտեցումների համար Վարազդատը պատվիրել էր պոկումում՝ 200 կգ, հրումում՝ 240 կգ: Իսկ դա նշանակում էր, որ նա մրցելույթները երկու վարժություններում էլ սկսելու էր այն ժամանակ, երբ բոլոր մրցակիցները ավարտած կլինեին իրենց աշխատանքը:
Եվ այդպես էլ եղավ ու առաջին իսկ մոտեցմամբ գլխավերեւում պահելով 200 կգ կշռող ծանրաձողը՝ Վարազդատը նվաճեց փոքր ոսկին: Հետո նա «սանձեց» նաեւ 210 կիլոգրամը, սակայն վերջին մոտեցման համար պատվիրած 218 կգ ծանրաձողն այս անգամ չենթարկվեց նրա կամքին: Այդուհանդերձ, Վարազդատ Լալայանը պոկում վարժությունից հետո ամբողջ 20 կգ-ով իրենից հետ թողեց մոտակա մրցակցին:
Պատմությունը կրկնվեց հրում վարժությունում: Արդեն հանդիսատեսի վերածված մրցակիցների աչքի առջեւ գյումրեցի հսկան առաջին իսկ մոտեցմամբ բարձրացրեց գրեթե քառորդ տոննա՝ 240 կիլոգրամը, ու միանգամից նվաճեց նաեւ հրում վարժության եւ երկամարտի (450 կգ) չեմպիոնի տիտղոսը:
Կարդացեք նաև
Վարազդատ Լալայանը տուն է վերադառնում Եվրոպայի կրկնակի չեմպիոնի տիտղոսով:
Աշոտ ՀԱԿՈԲՅԱՆ
