Ազատության հրապարակում գերմանացի իրավապաշտպաններն այսօր այցելել են արցախցիներին, ծանոթացել նրանց խնդիրներին:
Արցախցիների իրավունքների պաշտպանության խորհրդի անդամ Նժդեհ Իսկանդարյանը հանդիպումից հետո լրագրողներին որոշ մանրամասներ ներկայացրեց. «Մեզ համար հասկանալի էր՝ ինչու նրանք այդքան ինֆորմացված չեն: Սա եւս մեկ անգամ փաստում է, որ ՀՀ քաղաքական կուրսը չի ներկայացնում արցախցիների խնդիրները միջազգային հարթակներում: Խոսել ենք արցախցիների խնդիրների մասին, հատուկ դեպքեր ենք ներկայացրել: Օրինակ՝ 2023-ի սեպտեմբերի 19-ին Արցախում տեղի ունեցած խոշտանգումների մասին, որ միջազգային հարթակներում բարձրացնեն բոլոր խնդիրները: Խոսել ենք հավաքական վերադարձի մասին: Նրանք հետաքրքրվել են՝ ինչու ՀՀ այսօրվա վարչապետը, կառավարությունը միջազգային հարթակներում չի բարձրացնում արցախցիների խնդիրները: Նույնիսկ անհարմար էր մեզ համար, չգիտեինք՝ ինչ ասել, երբ որ եվրոպացիները հետաքրքրվում են մեր խնդիրներով: Լավ քննարկումներ ենք ունեցել, կարեւոր էր մեզ համար, որ եւս մի հարթակում կներկայացնեն բոլոր խնդիրները»:
Հիշեցնենք, որ մարտի 29-ի հանրահավաքից հետո արցախցիների իրավունքների պաշտպանության խորհուրդը վրան է տեղադրել, գործում է շտաբ, որտեղ տարբեր հանդիպումներ են կայանում: Գերմանացի իրավապաշտպանների հետ հանդիպումը այդ հանդիպումների շրջանակից էր:
Արփինե ՍԻՄՈՆՅԱՆ
Կարդացեք նաև
Լուսանկարը՝ արխիվային
