«Հայոց ցեղասպանութան 110-րդ տարելիցի կապակցությամբ Հայոց ցեղասպանության թանգարան-ինստիտուտը նախաձեռնել է մի շարք միջոցառումներ՝ գիտացուցադրական, գիտական, մշակութային եւ այլն»,- «Արմենպրեսի» մամուլի սրահում կայացած ասուլիսում նշեց «Հայոց ցեղասպանության թանգարան-ինստիտուտ» հիմնադրամի տնօրեն Էդիտա Գզոյանը:
Նա մասնավորապես նշեց, որ ապրիլի 23-ին Հայոց ցեղասպանության թանգարան-ինստիտուտում կբացվի ժամանակավոր ցուցադրություն՝ «Փաստագրելով հանցագործությունը. Հայոց ցեղասպանության ականատես վավերագրողները» խորագրով. «Իր ծավալով, խորությամբ եւ բնույթով ցուցադրությունը եզակի է լինելու, քանի որ նվիրված է տարելիցին, ուստի որոշեցինք, որ այն նյութը, որը պետք է ցուցադրվի, պետք է տարբերվի մնացած ցուցադրություններից: Անդրադառնալու ենք բոլոր այն մարդկանց՝ դիվանագետներ, միսիոներներ, լրագրողներ եւ այլն, որոնք Օսմանյան կայսրությունում էին Հայոց ցեղասպանության տարիներին եւ ինչ-որ ձեւով՝ լրագրողական հետաքննությունների, տեսանյութերի եւ լուսանկարների միջոցով փաստագրում էին հանցագործությունը»:
Էդիտա Գզոյանը հավելեց. «Հանցագործություն բառը հատուկ ենք շեշտել՝ ցույց տալու համար, որ այն, ինչ տեղի ունեցավ հայերի հետ 1915-1923թթ, չնայած չկար ցեղասպանություն բառը, բայց վավերագրողների նյութերը, նրանց հստակ բառամթերքը ցույց են տալիս, որ բոլորը խոսում են մի ամբողջ ազգի բնաջնջման մասին, Հայկական հարցի վերջնական լուծման մասին, ինչը կարեւոր է ցեղասպանություն հանցագործությունը հասկանալու համար»:
Նրա խոսքով, բացի 26 երկրների դիվանագետներից, լրագրողներից եւ այլն, հատուկ անդրադարձ ունեն նաեւ Օսմանյան կայսրությանը, քանի որ, Գզոյանի խոսքով, Օսմանյան կայսրությունում եւս կային մարդիկ, որոնք վավերագրում էին Հայոց ցեղասպանությունը, նշեց, որ անդրադարձել են նաեւ Կոստանդնուպոլսյան դատավարություններին. «Այդպիսով ցույց ենք տալիս, որ Օսմանյան կառավարությունը առաջին պետությունն էր, որն իրավական դատական պրոցեսների միջոցով ճանաչեց Հայոց ցեղասպանությունը: Խոսել ենք այն հանձնաժողովների մասին, որոնք ստեղծվել էին հավաքագրելու ամբողջ նյութը, որոնք հիմք հանդիսացան այդ դատական պրոցեսների համար, նաեւ թուրքական մամուլից ենք ցույց տալու տեղեկություններ, որոնցով փաստագրվում եւ վավերացվում էր Հայոց ցեղասպանությունը»:
Կարդացեք նաև
Մանրամասն՝ տեսանյութում
Գոհար ՀԱԿՈԲՅԱՆ
