Ծանրամարտի Եվրոպայի առաջնության նախավերջին օրն, ընդհանուր առմամբ հաջող դասավորվեց Հայաստանի համար: Երեկոյան մրցահերթում Տաթեւ Հակոբյանն ու Լիանա Գյուրջյանը պայքարեցին 87 կգ քաշայինների մեդալակիրներին որոշելու համար:
Մեր երկու աղջիկներն էլ արդյունավետ կատարեցին պոկում վարժության բոլոր երեք մոտեցումները: Տաթեւը հաջորդաբար բարձրացրեց 102, 106 եւ 110 կիլոգրամները եւ արժանացավ փոքր արծաթե մեդալի: Դրան, անկեղծորեն ասենք, նպաստեց այն, որ երկրորդ տեղի գլխավոր հավակնորդ, մեծբրիտանացի Դոդո Նգակեն երեք անգամ ձախողեց պատվիրած նախնական 112 կիլոգրամը:
Լիանան սկսելով 100 կգ-ից, այնուհետեւ գլխավերեւում պահեց 104 եւ 106 կգ ծանրաձողը, ինչը չորրորդ արդյունքն էր այս մրցաձեւում:
Կարդացեք նաև
Հրում վարժությունում պայքարը ցավալի ելք ունեցավ Տաթեւ Հակոբյանի համար: Նա երեք անգամ ծանրաձողը պահեց գլխավերեւում, սակայն մրցավարները երկուսում սխալ նկատեցին ու քաշը չհաշվեցին, ինչի հետեւանքով արձանագրվեց միայն 122 կգ-ն: Երկամարտի 232 կգ-ով Տաթեւը զրկվեց երկամարտում պատվո պատվանդան բարձրանալու հնարավորությունից: Իսկ Լիանան արձանագրելով 140 կգ՝ նվաճեց թե հրում վարժությունում, թե երկամարտում (246 կգ) Եվրոպային փոխչեմպիոնի տիտղոսը:
Աշոտ ՀԱԿՈԲՅԱՆ
