25 համարի ավտոբուսը երկուշաբթի օրվանից՝ ապրիլի 21-ից, Պռոշյան համայնք չի մտնելու: Այս մասին այսօր Պռոշյանի մշակույթի տան դիմաց բնակիչներին հայտնեց Պռոշյանի բնակիչ Սերգո Մուրադյանը:
«Խաբեցին, հույսով արեցին, թե 25 եւ 59 համար տրանսպորտի հարցը լուծման եզրին է: Բայց այժմ վերջնական որոշում են կայացրել, որ 25 համար ավտոբուսը գալու է Պաշտպանության նախարարության մոտից շրջադարձ կատարի ու Երեւան գնա, 59-էլ թիկունքի մոտից է շրջադարձ կատարելու, գնա»,- հայտնեց Մուրադյանը:
Նա նաեւ հայտնեց, որ Քասախ համայնքի բնակիչները ապրիլի 22-ի առավոտյան փակելու են Երեւան-Աշտարակ մայրուղին՝ իրենց բողոքի ձայնն արտահայտելու համար:
Կարդացեք նաև
Հիշեցնենք, որ Պռոշյանի բնակիչները պայքարում են 25 համարի ավտոբուսի երթուղու կրճատման եւ նոր՝ ավելի թանկ երթուղի մտցնելու դեմ։
Նոր երթուղին սպասարկելու է «Մուլտիտրանսպորտ» ընկերությունը՝ 250 եւ 200 դրամ արժեքով, եւ այս պարագայում տրանսպորտը հասնելու է մինչեւ Ֆիզիկայի ինստիտուտ: Բացի դրանից, վերջին տրանսպորտը քաղաքից շարժվելու է 19:30-ին։ Ցուցարարները նշում են, որ բացի թանկացումը, մեծ դժվարությամբ աշխատանքի հասնելուն զուգահեռ՝ եւս մեկ խնդիր է լինելու երեկոյան ժամերին տուն հասնելը:
Սերգո Մուրադյանը չի բացառում, որ 25 համարի ավտոբուսի՝ ՊՆ –ի մոտ հասնելու որոշումն էլ մի քանի ամիս տեւի, էդ էլ չեղարկեն. «Սա ժողովրդի աչքին թոզ փչել էր: Կարող է տեւել մի ամիս, երկու ամիս, երեք ամիս, կամ այդքան էլ չտեւի: Սա խաբկանք էր»:
Արփինե ՍԻՄՈՆՅԱՆ
