Հայաստանի զինված ուժերում պետք է հաստատվեն գլխավոր շտաբի սերժանտի, կորպուսի սերժանտի եւ շտաբի սերժանտի պաշտոններ․ խորհրդարանում այսօր ասաց ՀՀ պաշտպանության փոխնախարար Արման Սարգսյանը՝ ներկայացնելով «Պետական պաշտոններ զբաղեցնող անձանց և քաղաքացիական ծառայողների վարձատրության մասին» օրենքում լրացումներ կատարելու մասին նախագիծը։
Նա մանրամասնեց՝ զինված ուժերի պայմանագրային սերժանտների աշխատավարձերը հաշվարկելիս կկիրառվեն հատուկ գործակիցներ․ «Զինված ուժերում բարեփոխումների իրականացման գործընթացում առաջնային նշանակություն ունի սերժանտական համակարգի զարգացումը, որը պրոֆեսիոնալ զինված ուժերի ստեղծման առանցքային պայմանն է»։
Փոփոխությունների արդյունքում աշխատավարձի գործակիցներ կսահմանվեն գնդի (բրիգադի) սերժանտի և գումարտակի (դիվիզիոնի) սերժանտի պաշտոնների համար։
Ըստ Արամ Սարգսյանի, արևմտյան երկրների, ինչպես նաև Արևելյան Եվրոպայի բանակների սերժանտական համակարգի ուսումնասիրությունը ցույց է տվել, որ գնդի մակարդակի սերժանտական համակարգը ներառում է գլխավոր շտաբի և բանակի ուղղությունների սերժանտների առկայությունը, որոնք վերահսկում են ստորին մակարդակի սերժանտների գործունեությունը և ապահովում սերժանտական համակարգի ուղղահայաց հրամանատարությունը: ՀՀ զինված ուժերում պրոֆեսիոնալ սերժանտական համակարգի լիարժեք ներդրումը և դրանց գործունեության պատշաճ ապահովումը ենթադրում է նաև բանակի, կորպուսի և ավագ սերժանտների պաշտոնների ստեղծում․ «Դրա հետ կապված անհրաժեշտություն է առաջացել վերոնշյալ պաշտոնների համար սահմանել աշխատավարձի գործակիցներ»։
Կարդացեք նաև
Ընդդիմադիր «Հայաստան» դաշինքի պատգամավոր Գեղամ Մանուկյանն ասաց, որոշակի վերապահումներ ունեն այս բարեփոխումների վերաբերյալ։ Ընդդիմադիր խմբակցության անդամները ցանկանում են մանրամասներ իմանալ սերժանտական նոր համակարգի վերաբերյալ։ Գլխավոր շտաբի եւ ՊՆ բարձրաստիճան ներկայացուցիչները խոստացել են տրամադրել այս մանրամասները, բայց չեն տրամադրել։ Փոխնախարարն ասաց, որ փաստաթուղթը պատրաստ է՝ կտրամադրվի։
Մանրամասները՝ տեսանյութում
Նելլի ԳՐԻԳՈՐՅԱՆ
