«Եթե այս մեղադրանքով ինձ դատում են, կարող են մի օր էլ ջուր խմելու համար մեղադրանք առաջադրել: Մանավանդ, որ Երեւանում ջուր են խմում, շինուհայրցիները մնում են առանց ջուր: Երեւանում ատամ են լվանում, Շինուհայրում մնում են առանց ջուր: Կարո՞ղ է ջուր խմելը դառնա մեր գլխին փորձանք»,- այսօր Երեւան քաղաքի ընդհանուր իրավասության դատարանի Կենտրոն նստավայրում Էդգար Ղազարյանի վերաբերյալ «ՍԴ դատավորների գործով» նիստի ավարտից հետո լրագրողների հետ զրույցում ասաց հասարակական գործիչ Էդգար Ղազարյանը:
Անդրադառնալով քրեական վարույթը կարճելու վերաբերյալ իր միջնորդությունը չքննարկելու դատարանի այսօրվա որոշմանը՝ Ղազարյանն ասաց. «Ես զարմացած եմ, որ դատարանը նման դիրքորոշում հայտնեց: Որովհետեւ դատարանը Քրեական դատավարության օրենսգրքով հիմա հանդիսանում է վարույթ իրականացնող մարմին: Եթե վարույթ իրականացնող քննիչը ցանկացած պահի կարող է վարույթը կարճել, ուզում եմ հասկանալ՝ դատարանն ինչո՞ւ է կաշկանդված»:
Անդրադառնալով իր միջնորդության հիմքերին, պարոն Ղազարյանն ընդգծեց, որ հիմքը նախորդ դատական նիստին նիստը նախագահողի հայտնած դիրքորոշումն էր. «Միջնորդություն ենք ներկայացնում, ասում ենք՝ ՍԴ դատավորներին բերեք, ճանաչենք որպես տուժող: Դատարանն ասում է՝ նրանք իրենց համար ֆիզիկական անձինք են, մասնակից չեն այս գործին: Բա եթե իրենք տուժող չեն, ես ինչի՞ եմ մեղադրյալ: Եթե նախորդ նիստում ասում եք՝ նրանք տուժող չեն, նշանակում է՝ այս քրեական գործը գոյություն չունի, խնդրում ենք այդ հիմքով սա կարճեք: Վարույթի հիմքն էլ հանդիսացել է ոչ իրավաչափ փաստաթուղթ: Մեկը մեկին նամակ է գրել, ես դատվում եմ: Սենց բա՞ն է լինում»:
Կարդացեք նաև
Արփինե ՍԻՄՈՆՅԱՆ
