Մարդու իրավունքների պաշտպան Անահիտ Մանասյանն ապրիլի 16-ին ողջույնի խոսքով է հանդես եկել «Կանայք քաղաքականության, հանրային կառավարման և քաղաքացիական հասարակության մեջ» ծրագրի փակման արարողությանը։
Ողջունելով ներկաներին՝ Անահիտ Մանասյանը նշել է, որ իրավահավասարության երաշխավորումն իր աշխատանքի կարևոր ուղղություններից է։ Պաշտպանն ընդգծել է, որ ոլորտում առկա խնդիրները բազմաթիվ են և շատ հաճախ կարծրատիպային մոտեցումների արդյունք են։
«Իրավահավասարության և հակախտրականության մասին այսօրվա մեր պատկերացումները դեռևս պատշաճ չեն և հաճախ չեն համապատասխանում գործող միջազգային չափանիշներին։ Խնդիրն ավելի ակնառու է, երբ դիտարկում ենք, օրինակ՝ հաշմանդամություն ունեցող և հաշմանդամություն ունեցող անձին խնամող, ազգային փոքրամասնությունները ներկայացնող կանանց և այլն։ Որպես Մարդու իրավունքների պաշտպան, կարող եմ ասել, որ նրանց խնդիրները լիարժեք հասցեավորված չեն: Իսկ դա ուղղակի ազդեցություն է ունենում մարդկանց ճակատագրերի վրա»,- ասել է Պաշտպանը։
Իր խոսքում Անահիտ Մանասյանն ընդգծել է, որ ոլորտում խնդիրները հաղթահարելու համար անհրաժեշտ է ունենալ հանրային կառավարման բնագավառ, որը գենդերազգայուն է։ Այս համատեքստում որպես ծրագրի կարևոր արդյունք Պաշտպանը նշել է Գենդերային հավասարության պարգևադրոշմի (ԳՀՊ) ներդրման գործընթացը. «Ուրախությամբ կարող եմ նշել, որ Գենդերային հավասարության պարգևադրոշմը Հայաստանի Հանրապետությունում պաշտոնապես ամբողջ ծավալով գործարկվել է առաջին անգամ։ Մարդու իրավունքների պաշտպանի հաստատությունը դարձել է մարդու իրավունքների պաշտպանության առաջին ազգային հաստատությունը, որն անցնում է պարգևադրոշմի ներդրման համար գնահատումը»։
Կարդացեք նաև
Միջոցառման շրջանակներում անցկացվել են պանելային քննարկումներ ոլորտային թեմաների շուրջ։
Միջոցառմանը մասնակցել են գործադիր իշխանության, տեղական ինքնակառավարման մարմինների, միջազգային կազմակերպությունների և քաղաքացիական հասարակության ներկայացուցիչներ։
«Կանայք քաղաքականության, հանրային կառավարման և քաղաքացիական հասարակության մեջ» ծրագիրն իրականացում է ՄԱԶԾ Հայաստանի կողմից՝ ՕքսԵՋեն հիմնադրամի և ՀՀ տարածքային կառավարման և ենթակառուցվածքների նախարարության հետ համատեղ։
Մարդու իրավունքների պաշտպան
