Կոմունիստական կուսակցության ցուցակով առաջադրված Վարդան Ղուկասյանը, որն այսօր 18 ձայնով ընտրվեց քաղաքապետ՝ 5-րդ անգամ ստանձնելով այս պաշտոնը, լրագրողների հետ զրույցում ասաց, որ իր առաջին քայլը լինելու է կադրային հարցի լուծումը։
Բացի այդ, ըստ նրա, մյուս քաղաքական ուժերի ներկայացուցիչներին է հրավիրելու ու համատեղ քննարկելու են բոլորի ծրագրերը, ընդհանուր հայտարարի գալուց հետո անցնելու են ծրագրերի իրականացմանը։
«Կոնկրետ աշխատավարձի բարձրացման հարցն եմ բարձրաձայնելու ու գտնելու ենք լուծումները, թե ոնց ենք գտնելու, բյուջեն ոնց ենք ավելացնելու, որ կարողանանք մարդկանց աշխատավարձը բարձրացնել։ Ես գիտեմ ՝ դա ինչ սկզբունքով պիտի անենք, ոնց պիտի անենք և որտեղից պիտի բյուջեն ավելացնենք»։
Անդրադառնալով այն հարցին՝ եթե ՔՊ-ն չմասնակցի ավագանու նիստերին, ինչպես այսօր, ինչ կլինի, Վարդան Ղուկասյանը կարծիք հայտնեց, որ պիտի մասնակցեն, այնտեղից շատ մարդիկ պիտի գան, քանի որ սա քաղաքի համար է, ոչ թե Վարդան Ղուկասյանի մասին է խոսքը, այլ ժողովրդի։
Կարդացեք նաև
«Էստեղ Ղուկասյանի խնդիրը չէ, էստեղ քաղաքի բնակչության խնդիրն է։ Եթե իրենք պիտի ոտ պահեն բնակչությանը, բնակչությունը իր կարծիքը կասի իրենց մասին ընտրություններում»,- ասաց Վարդան Ղուկասյանը։
Մարտուն Գրիգորյանի գլխավորած «Մեր քաղաքը» դաշինքի հինգ անդամներ այսօր իրենց ձայնը տվեցին Վարդան Ղուկասյանին՝ նրան օգնելով քաղաքապետ ընտրվել։ Վարդան Ղուկասյանից հարցրեցին՝ շնորհակալություն կհայտնի՞ Մարտուն Գրիգորյանին։
«Գիտեք, էդպես ասելը մի քիչ սիրուն չէ, բայց ես երբ տեսնեմ, ինչ է պատահել, ես խնդիր չունեմ, ասել եմ, մենք ոխերիմ թշնամիներ չենք, ես իրենց ոխերիմ թշնամի չեմ ճանաչում, ես իրենց ազգի հետ, իրենք մեր ազգի հետ շատ բարիդրացիական հարաբերություններ ունենք»։
Հարցին էլ ՝ թե ձեր հաղթանակը բնութագրում են որպես Պյուռոսյան հաղթանակ․ ամեն անգամ կարևոր որոշումներ կայացնելիս՝ պիտի գնաք Մարտուն Գրիգորյանի դուռը ու խնդրեք նրան օգնել, Վարդան Ղուկասյանը պատասխանեց․ «Ես ոչ մեկի դուռը չեմ գնա, ուրեմն՝ ես կապրեմ էնպես, ինչպես ապրել են ընդդիմադիր քաղաքապետերը, ինչպես եղել է կարգը, ոնց որ մարդիկ ապրել են։ Ես էդ սկզբունքով կապրեմ, ես ոչ մեկի դուռ չեմ գնում ընդհանրապես, սրբի դուռ, իհարկե, գնում եմ, բայց իմ զենքը համերաշխությունն է, ներողամտությունը, ես միշտ դրանով առաջնորդվել եմ իմ ողջ կյանքի ընթացքում»։
Նունե ԱՐԵՎՇԱՏՅԱՆ
