«Փաշինյանն, ըստ էության, նույն բանը կրկնեց, որ չեն շեղվելու խաղաղության ուղուց, շարունակելու են աշխատել այդ ուղղությամբ, այսինքն` իրենց դիրքերը չեն փոխում: Բայց այդպիսով բանակցություններում միշտ խնդիր է լինում:
Եթե մենք հիշում ենք՝ Փաշինյանը ժամանակին ասում էր, որ 2018թ հայտնաբերեց, որ բանակցությունները փակուղու մեջ են, բայց հիմա էլ են դրանք փակուղում, սակայն սա շատ վտանգավոր փակուղի է, որովհետեւ այդ փակուղին առաջին հերթին նշանակում է, որ ադրբեջանական եւ թուրքական կողմերը չեն հրաժարվելու իրենց օրակարգից»,-«Հայելի» ակումբում նշեց քաղաքագետ Արթուր Մարտիրոսյանը:
«Ադրբեջանը եւ Թուրքիան տեսնում են, որ Հայաստանի ներսի քաղաքական հարցերի համար Փաշինյանին շատ կարեւոր է ստանալ ինչ-որ մի փաստաթուղթ, որը նա կարող է բնակչությանը վաճառել իբրեւ խաղաղության ապացույց ու ասել, որ իբր ապահովել է խաղաղություն: Քանի որ գնում ենք դեպի 2026թ ընտրություններ, նախապատրաստական աշխատանքներ են արվում: Այդ ամենը հասկանալով՝ ադրբեջանական կողմը ավելի թանկ գնով է ուզում վաճառել այդ փաստաթուղթը Փաշինյանին: Դա նշանակում է, որ իրենք պահանջելու են նոր զիջումներ, փորձելու են ստանալ այն ամենը, ինչի մասին այլ պարագայում եւ այլ խաղացողի հետ հնարավոր էլ չէր լինի նույնիսկ մտածել…
Փաշինյանը խոսում է խաղաղության մասին, իսկ Ադրբեջանն իր ռազմական ծախսերը հասցրել է տարեկան 5 միլիարդի: Սա խոսում է նրա մասին, որ դու տանում ես մի գիծ, որը քեզ ժամանակին պարտադրել էին Վաշինգտոնից, թե Բրյուսելից, դու էլ ընտրել ես ֆարվատեր, չես ուզում նորից նայել խաղին, շեղվել, ի վիճակի էլ չես այլ բան անել: Իսկ այդ ձեւաչափերում քեզ սպասվում է միայն ճնշում, որպեսզի ստանան ավելին, եթե չես կարող հանրայնացնել զիջումները, կպայմանավորվեն փակ ֆորմատներով, որոնց մասին բնակչությունը կիմանա ապագայում՝ ուշացումով կամ նույնիսկ կարող է չիմանալ էլ, որ դրա մասին կողմերը պայմանավորվել են, բայց զիջումները տեղի ունենան»,-հավելեց քաղաքագետը:
Կարդացեք նաև
Ինչ վերաբերվում է Մինսկի խմբից հրաժարվելու մասին իշխանությունների խոսույթին, այս մասին էլ Արթուր Մարտիրոսյանը նշեց. «Դա նշանակում է, որ դու էլ Ալիեւի նման համարում ես, որ Արցախի հարցը լուծված է, փակ է եւ այդտեղ վերջակետ է պետք դնել: Դա Ալիեւի ցանկությունն է, դու անում ես այն, ինչ քեզ պարտադրում են: Այս հարցը թաքցնել չի լինի, որովհետեւ հանրային դաշտում է, բայց թե ինչ զիջումների կգնա Փաշինյանի թիմը, մենք կարող է նույնիսկ չիմանալ: Եվ սա է ամենամեծ վտանգը: Որքան էլ խոսվում է ժողովրդավարության մասին, արտաքին քաղաքականությունը թափանցիկ չէ, իրենք որոշումներ են ընդունում, որոնք հակասում են հայկական, ազգային շահերին; Իրենք էլ զբաղված են նրանով, որ ձեւափոխում են ոչ միայն ազգային շահերի ընկալումը, այլեւ փորձում են ձեւափոխել հայկական ինքնության հիմքերը»:
Գոհար ՀԱԿՈԲՅԱՆ
