Քիչ առաջ Գյումրու նորընտիր ավագանու կազմում ընդգրկված խմբակցությունների ղեկավարները հերթով ելույթ ունեցան` հայտարարելով` քաղաքապետի թեկնածու առաջադրելո՞ւ են, թե՞ ոչ։
«Մայր Հայաստան» խմբակցության ղեկավար Կարեն Սիմոնյանը նշեց. «Մենք ի սկզբանե հայտարարել ենք, որ իշխանազրկելու ենք ՔՊ-ին, տեր ենք մեր խոստմանը, քաղաքապետ չենք առաջադրելու, Գյումրին մերժում է վատ կառավարումը, հետևաբար ՔՊ-ին»։
Կարդացեք նաև
Վարդան Ղուկասյանը բացականչեց. «Ջա`ն»։
«Իմ հզոր համայնքի» ղեկավար Ռուբեն Մխիթարյանն էլ ասաց. «Գյումրին քաղաք է, ճիշտ է ասում Վարդան Ղուկասյանը՝ համայնք չէ։ Մենք նույնպես քաղաքապետի թեկնածու չենք առաջադրում, պետության առավելագույն շահը պահանջում է առաջադրել առավելագույն ձայներ հավաքած ընդդիմադիր թեկնածուին»:
«Մեր քաղաքը» խմբակցությունը ևս հայտարարեց, որ չի առաջադրելու քաղաքապետի թեկնածու։
Կոմունիստական կուսակցությունը ներկայացրեց իր թեկնածուին` Վարդան Ղուկասյանին։
Նա ելույթ ունեցավ ամբիոնից, փառք տվեց երկնային տիրոջը` համերաշխ ընտրության համար։
Ըստ Վարդան Ղուկասյանի, ինչքան էլ ուզեցին խառնել՝ չստացվեց։
Նա շնորհակալություն հայտնեց քաղաքական ուժերին և ազգաբնակչությանը։ Հայտարարեց` որդեգրելու են համերաշխությունն ու կառուցողականությունը` հիմք ընդունելով հայրենիքի շահը։
Վարդան Ղուկասյանը հիշեցրեց, որ ինքը նոր չէ` որպես քաղաքի կառավարիչ, հիշեցրեց, որ 40 հազար տնակներ են հանվել իր օրոք քաղաքից, քաղաքապետարանի շենքն է կառուցվել։
«Եթե քաղաքի շահը որևիցե մեկը ուզում է ոտ պահել՝ Աստծո առաջ պատասխան կտա»,-ասաց Վարդան Ղուկասյանը։
Նա նշեց, որ լսելու են նաև այլ ուժերի ծրագրերը, քանի որ ինքը լսելու կարողություն ունի։
«Իմ քաղաքական հենարանը ճշմարտությունն է, որի տերը Աստված է»,-ասաց նա։
Նա նաև հայտարարեց, որ ծանր աշխատանքի է լծվելու, որին դեմ է ընտանիքը, խռով է նրանց հետ։
«Տեսնելով երկրի վիճակը, թե ուր է գնում հայոց նավը և տեսնելով, որ 37 տարի ամենաաղքատ քաղաքն է Գյումրին, դրա համար առաջադրել եմ իմ թեկնածությունը»,-պարզաբանեց Վարդան Ղուկասյանը։
Նա նաև նշեց, որ ընտրություններին փող չի բաժանել, արդար ճանապարհով է ընտրվել, խոստացավ ավելացնել քաղաքի բյուջեն։
Նունե ԱՐԵՎՇԱՏՅԱՆ
