«2018-ի ոչ բռնի, թավշյա հեղափոխությունից հետո, միայն 2024 թվականի արդյունքներով, ՀՀ բյուջեի եկամուտներն ավելի քան կրկնապատկվել են՝ ավելանալով 1,3 տրիլիոն դրամով կամ 3,3 միլիարդ դոլարով։ Այսինքն, հեղափոխությունից հետո ՀՀ բյուջե մուտք է եղել հավելյալ 3,3 միլիարդ դոլար»,- այս մասին այսօր խորհրդարանում հայտարարեց Նիկոլ Փաշինյանը։ Նա ներկայացնում էր կառավարության 2021-26 թվականների ծրագրի՝ 2024 թվականի ծրագրի կատարման ընթացքը։
Ըստ նրա, 2018-ի հեղափոխությունը ՀՀ բյուջեի աճին տեմպ է տվել եւ ՔՊ-ի իշխանության յոթ տարիների ընթացքում ՀՀ պետբյուջե լրացուցիչ մուտք է եղել 4,2 միլիարդ դոլար գումար։ Այս թվի մեջ Նիկոլ Փաշինյանը չի հաշվառել պետական պարտքը, «Հայաստան» հիմնադրամի 2020-ին փոխանցած գումարները, քովիդի համավարակի համար ստացված գումարները։
«Խոսքը բյուջեի մաքուր հեղափոխական եկամտի մասին է»,- ասաց նա՝ հավելելով, որ այս թվերը ներկայացնում է՝ հակադարձելով քննադատություններին, թե ՔՊ-ական կառավարությունը հեղափոխությամբ եկել է իշխանության՝ մոռանալով թալանը ետ բերելու խոստումը։ «Բա այս 4,2 միլիարդ դոլարը օդի՞ց է ընկեր, հարգելի ժողովուրդ»,- հարցրեց նա։
Իսկ թալանվածը ետ բերելու համար, ըստ նրա, նախ թալանի տեղն ու մեխանիզմը պետք է հասկանալ․ դա ստվերային տնտեսությունն է, հարկերից խուսափելը եւ մենաշնորհը, որի արդյունքում էլ կազմավորվել են բյուջետային մուտքերը։
Կարդացեք նաև
ՔՊ-ի հասցեին՝ թալանը ետ բերելու մասով քննադատություններին ի պատասխան՝ Նիկոլ Փաշինյանը նաեւ հիշեցնում է, որ հայտարարել են վենդետաները բացառելու մասին՝ ՀՀ-ն աշխարհի քարտեզի վրա «բեզպրեդելի սեւ խորշ չդարձնելու» համար եւ խոստացել են՝ ՀՀ-ն օրենքի գերակայության երկիր դարձնել, ինչն էլ, ըստ իրեն, անում են։
Մանրամասները՝ տեսանյութում
Նելլի ԳՐԻԳՈՐՅԱՆ
