Մոլդովայում մեկնարկած ծանրամարտի Եվրոպայի առաջնությունում այսօր Հայաստանն ուներ երեք մասնակից:
Կանանց 55 կգ քաշային կարգում Եվրոպայի արդեն նախկին չեմպիոն Ալեքսանդրա Գրիգորյանը երկամարտի 202 (85+117) կգ արդյունքով այս անգամ բավարարվեց փոխչեմպիոնի տիտղոսով: Սակայն մեր աղջիկը փոքր ոսկու արժանացավ հրում վարժությունում:
Ալեքսանդրայի թիմակից Իզաբելլա Յայլյանը պոկում վարժությունում գրանցեց 90 կգ, հրումում՝ 103 կգ եւ երկամարտի 193 կիլոգրամով հանգրվանեց 6-րդ հորիզոնականում:
Կարդացեք նաև
Ավելի ուշ 61 կգ քաշային Գառնիկ Չոլակյանը պոկում վարժությունում սանձելով 124 կգ ծանրաձողը՝ արժանացավ փոքր արծաթե մեդալի, հրում վարժությունում ցույց տվեց 4-րդ արդյունքը (151 կգ), իսկ երկամարտում իր անվան դիմաց գրանցելով 275 կգ ցուցանիշ, նվաճեց բրոնզե մեդալ:
Աշոտ ՀԱԿՈԲՅԱՆ
